O‘zbekiston yagona energetika tizimida 14-iyul kuni yozgi mavsum uchun elektr energiyasi iste’moli 284 million kVt/soatga yetib, yangi tarixiy rekord qayd etildi. Bu haqda Energetika vazirligi ma’lum qildi. Qayd etilishicha, mazkur ko‘rsatkich 13-iyuldagi yozgi rekord (278,6 million kVt/soat) hamda 24-yanvarda qayd etilgan qishki maksimum (283 million kVt/soat)dan ham yuqori bo‘lgan. Rekord qayd etilgan kunda mamlakatda 287,3 million kVt/soat elektr energiyasi ishlab chiqarilgan.

Vazirlik yuqori iste’mol davrida ayrim hududlarda texnik nosozliklar sabab elektr ta’minotida vaqtinchalik uzilishlar kuzatilishi mumkinligini bildirib, aholini elektr energiyasidan oqilona foydalanishga chaqirdi. Shuningdek, konditsionerlarni 24–26°C haroratda ishlatish va filtrlarini muntazam tozalab turish tavsiya etildi. Bu elektr energiyasi sarfini kamaytirish, tarmoqlarga tushadigan yuklamani pasaytirish hamda salomatlik uchun qulay sharoit yaratishga xizmat qiladi.