2027-yilda mamlakatda kishi boshiga YAIM 5 ming dollardan oshishi kutilmoqda. Bu O‘zbekistonga yuqori-o‘rta daromadli davlatlardan biriga aylanish imkonini beradi. Yuqori daromadli davlatlar qatoridan esa taxminan 2040-yilda joy olish mumkin.

2027-yilda O‘zbekistonda aholi jon boshiga yalpi ichki mahsulot (YAIM) 5 ming dollardan oshishi prognoz qilinmoqda. Bu haqda 2027–2029-yillarga mo‘ljallangan Fiskal strategiyadan ma’lum bo‘ldi.

Strategiyada keltirilgan prognozga ko‘ra, 2026-yilda O‘zbekiston iqtisodiyoti 8,1 foizga o‘sib, 2 kvadrillion 183 trillion so‘mga yetadi. Natijada aholi jon boshiga YAIM 4 629 dollarni tashkil qiladi.

Bu Jahon banki tomonidan tavsiflanuvchi yuqori-o‘rta daromadli mamlakatlar uchun belgilangan 4 636–14 375 dollar oralig‘idan biroz kamroqdir.

Shunga qaramay, 2027-yilda iqtisodiy o‘sish 6,9 foiz atrofida bo‘lishi prognoz qilinmoqda. Bunda iqtisodiyot 2 kvadrillion 474 trillion so‘mga yetadi va kishi boshiga YAIM 5 106 dollargacha ko‘tariladi.

Shu tariqa, O‘zbekiston ushbu ko‘rsatkich bilan dunyo bo‘ylab yuqori-o‘rta daromadli davlatlar qatoridan joy olishi mumkin.

2025-yil holatiga ko‘ra, O‘zbekiston quyi-o‘rta daromadli davlatlardan biri hisoblanadi. 1999-yildan 2008-yilgacha mamlakat kam daromadli davlat sifatida qayd etilgan.