Qozog‘iston Rossiya siyosatidan rozi bo‘lmasa, buni baralla ayta oladi. Bu haqda Prezident huzuridagi strategik tadqiqotlar instituti xalqaro tadqiqotlar bo‘limi rahbari Asel Nazarbetova jurnalistlar tomonidan berilgan savolga javob berish vaqtida aytib o‘tdi.

“Yangi geosiyosiy vaziyatda Markaziy Osiyo hamkorligi: muammolar va istiqbollar” mavzusida bo‘lib o‘tgan konferensiya doirasida jurnalistlar ekspertlarga yuzlanib “Rossiya va Ukraina o‘rtasidagikeskinlikdan keyin Qozog‘iston va Rossiya o‘rtasida masofa bormi?”, degan savolni berishgan.

Prezident huzuridagi strategik tadqiqotlar instituti xalqaro tadqiqotlar bo‘limi rahbari Asel Nazarbetova ushbu savolga quyidagicha javob berdi:

“Rossiyadan uzoqlasha boshladik, deyish qiyin. Biroq, biz o‘z pozitsiyamizni aniqlay oladigan nuqtada turibmiz. Ya‘ni, Rossiya siyosatiga rozi bo‘lmasak, albatta, buni milliy manfaatimiz nuqtai nazaridan baralla aytishimiz mumkin. Bu bizning mustaqil suveren davlat ekanligimizdan dalolat beradi. Albatta, biz mamlakat bilan iqtisodiy aloqalarimizni uzolmaymiz. Ushbu tizim bir necha yillardan beri mavjud. Shuning uchun bu tizimni buzish biz uchun qiyin bo‘ladi”, – degan u.

Shuningdek, Nazarbetova Rossiya kompaniyalarining Qozog‘istonda vakolatini boshlashi haqidagi savolga ham munosabat bildirgan.

“Bu masala bo‘yicha dunyoviy sanksiyalarga qattiq amal qilgan holda ehtiyotkorlik bilan yondashiladi”, – degan ekspert.

• Ekspert fikri
• Qozog‘iston
• Rossiya
• Siyosat