Sivilizatsiya davom etishi uchun odamlar farzand ko‘rishni ko‘paytirishi kerak. Bu haqida milliarder Ilon Mask The Wall Street Journal bilan videokonferensiyada aytib o‘tgan.
Milliarder tezlik bilan pasayib borayotgan tug‘ilishni “sivilizatsiya uchun eng katta xavflardan biri” deb ta’kidlagan. Tadqiqotlarga ko‘ra, tobora ko‘proq odamlar iqlim o‘zgarishi va iqtisodiy tengsizlikni bahona qilib, farzand ko‘rmaslikni afzal ko‘rmoqda.
Ilon Maskning ta’kidlashicha, juda ko‘p “aqlli odamlar” sayyora aholisi haddan tashqari ko‘p deb o‘ylaydi va vaziyat nazoratdan chiqib ketmoqda. 
“Buning aksi haqiqat. Agar odamlar farzand ko‘rmasa, sivilizatsiya barbod bo‘ladi. Mening so‘zlarimni eslang”, — deydi Tesla rahbari.
CNBC’ning yozishicha, Morgan Stenli iyul oyida iqlim o‘zgarishi qo‘rquvi ostida bolalarsiz harakat o‘sib borayotganini va tug‘ilish darajasining oldingi pasayish tendensiyasiga qaraganda tezroq ta’sir qilishini aytgan.
Tahlilchilar so‘rovlar, akademik tadqiqotlar va Google ma’lumotlariga asoslanib, iqlim o‘zgarishi bevosita yoki bilvosita tug‘ilish darajasining pasayishini tezlashtirayotganini ma’lum qildi.
Shuningdek, Los-Anjelesdagi Kaliforniya universiteti tomonidan olib borilgan tadqiqot shuni ko‘rsatdiki, Qo‘shma Shtatlarda yangi tug‘ilgan chaqaloqlar soni jazirama to‘lqinidan keyin to‘qqiz oy ichida kamaygan. 2020-yil Xitoyda 18 ming juftlik o‘rtasida o‘tkazilgan tadqiqot iqlim o‘zgarishi, xususan, havo ifloslanishi, bepushtlik ehtimolining 20 foizga oshishi bilan bog‘liq ekanini ko‘rsatgan.

• Chaqaloq
• Ilon_Mask
• Tesla