Alibaba Group aksiyalarini qaytarib sotib olish dasturini 15 milliard dollardan 25 milliard dollargacha kengaytirayotganini eʼlon qildi, bu Xitoy texnologik kompaniyasi uchun rekord darajadagi miqdor. 

Kompaniya Xitoy hukumati bosimi ostida o‘z aksiyalari narxining o‘sishini qo‘llab-quvvatlash maqsadida yana ikki yil davomida, 2024-yilning martigacha o‘z aksiyalarini sotib olishni davom ettiradi.

Hozirgi kengayish uchinchisi. Dastlab Alibaba aksiyalarini 6 milliard dollarga sotib olishni rejalashtirgan edi. Ammo 2020-yil oxirida Xitoy rasmiylari kutilmaganda birinchi bo‘lib Alibaba Group moliyaviy bo‘limi bo‘lmish Ant Group’ning IPO’sini bekor qildi, so‘ngra internet giganti ustidan tergov boshladi. Kompaniya aksiyalari tushib ketdi. Alibaba rahbariyatining munosabati aksiyalarni qaytarib sotib olish dasturini 10 milliard dollargacha kengaytirish qarori bo‘ldi.O‘tgan yilning avgust oyida esa kompaniya bu miqdorni 15 milliard dollarga oshirdi. Biroq bu Alibaba’ga o‘z aksiyalari narxini saqlab qolishda unchalik yordam bermadi. 

Aksiyalarni qaytarib sotib olish dasturining navbatdagi kengayishi e’lon qilinganidan so‘ng, Alibaba kotirovkalari Gonkong birjasida 11 foizdan ko‘proqqa ko‘tarilmoqda.

Qayd etish joiz, Alibaba Group internet-tijorat sohasida faoliyat yuritadi. Korporatsiya Taobao.com, Tmall, Alibaba.com, AliExpress va boshqa bir qator veb-portallarga ega.

• Alibaba
• Xitoy