AQSh Markaziy qo‘mondonligi Prezident Donald Tramp topshirig‘iga binoan Erondagi bir nechta nishonlarga qarshi “o‘zini himoya qilish maqsadida qo‘shimcha zarbalar” berila boshlanganini ma’lum qildi.

Harbiylar bayonotiga ko‘ra, hujumlar Eronning “asossiz va davom etayotgan tajovuzi”ga javob sifatida amalga oshirilmoqda. AQSh Mudofaa vaziri Pit Hegset ham Markaziy qo‘mondonlik faol harbiy harakatlarni boshlashini tasdiqlab, Prezident Trampning “Eronga kuchli zarba berish” bo‘yicha ko‘rsatmasi bajarilayotganini aytdi.

Shu bilan birga, Hegset Eron hali ham muzokaralar yo‘lini tanlashi yoki mojaroni yanada keskinlashtirish mumkinligini ta’kidladi.

10-iyun kuni Eronning “Mehr” agentligi mamlakat Islom inqilobi qo‘riqchilari korpusi Jam shahri osmonida AQShning MQ-9 Reaper uchuvchisiz uchish apparatini urib tushirganini xabar qilgan edi.

Avvalroq Donald Tramp muzokaralarda sezilarli siljish kuzatilmayotgani hamda AQShning Apache jangovar vertolyoti yo‘q qilingani ortidan Eronga qarshi bombardimonlarni qayta boshlash niyatida ekanini bildirgan. Mazkur vertolyot 8-iyun kuni Ummon sohillari yaqinida halokatga uchragan, uning ikki uchuvchisi qutqarib qolingan.

Eron Prezidenti Mas’ud Pezeshkiyon esa mamlakati “qat’iy turishini” ma’lum qilib, AQSh tahdidlarini qoraladi.

“Axios” nashri manbalariga ko‘ra, Donald Tramp milliy xavfsizlik bo‘yicha rasmiylar bilan yig‘ilish o‘tkazgan. Muhokama qilinayotgan ssenariylardan biri Eronga qarshi qisqa muddatli, ammo keng ko‘lamli harbiy operatsiyani boshlash bo‘lib, uning asosiy maqsadi Tehronni muzokaralardagi pozitsiyasini o‘zgartirishga majbur qilishdan iborat.