Isroil o‘zbekistonlik mehnat migrantlari orasida ko‘p tilga olinmasa-da, so‘nggi yillarda ushbu mamlakat O‘zbekiston fuqarolari uchun muhim ish yo‘nalishlaridan biriga aylanib bormoqda. Ma’lumotlarga ko‘ra, 2023 yilda Isroilda 10,5 mingdan ortiq O‘zbekiston fuqarosi yashagan bo‘lib, ularning aksariyati qariyalarga qarash sohasida faoliyat yuritgan. Ayniqsa, Samarqand viloyatidan borgan fuqarolar bu yo‘nalishda salmoqli ulushni tashkil etadi.2022 yilda O‘zbekiston va Isroil o‘rtasida mehnat migratsiyasi bo‘yicha vaqtinchalik bandlikni nazarda tutuvchi kelishuv imzolanishi ikki davlat o‘rtasidagi hamkorlikni yangi bosqichga olib chiqdi.

2025 yil yakuniga kelib Isroilda xorijiy ishchilar soni 227,5 ming nafarga yetgan. Shundan 62,9 ming nafari uy sharoitida qariyalarga parvarish ko‘rsatish xizmatida ishlaydi. Qayd etilishicha, Isroildagi o‘zbekistonlik mehnat migrantlarining 95 foizdan ortig‘i aynan qariyalarga qarash sohasida band. Bu esa mamlakatni O‘zbekiston uchun ixtisoslashgan mehnat migratsiyasi yo‘nalishlaridan biriga aylantirmoqda.

Rasmiy statistikaga ko‘ra, Isroilning parvarish xizmatlari bozorida Hindiston 39 foiz ulush bilan birinchi o‘rinda turadi. Undan keyin Filippin 23 foiz, O‘zbekiston esa 20 foiz ulush bilan yetakchi davlatlar qatoridan joy olgan.