Qashqadaryo viloyatining Qarshi shahrida huquq faoli Javohir Mo‘minovga nisbatan qiynoq qo‘llangani haqida da’volar yangradi. Bu haqda “Ezgulik” inson huquqlari jamiyati raisi Abdurahmon Tashanov ma’lum qildi.

Uning ta’kidlashicha, Javohir Mo‘minov Qarshi shahar ichki ishlar boshqarmasida boshiga qop kiydirilgan holda kaltaklangan va qiynoqqa solingan. Shuningdek, voqeadan so‘ng unga tez tibbiy yordam chaqirilgani aytilmoqda.

Tashanovning bildirishicha, huquq faolining himoyachisi sifatida ishtirok etgan advokat Lazizjon Sharipov ham tan jarohati olgan. Mazkur holat yuzasidan sud-tibbiy ekspertiza tayinlangani ma’lum qilingan.

E’lon qilingan hujjatlarga ko‘ra, Qarshi shahar prokuraturasi advokatning tan jarohatlari bo‘yicha ekspertiza o‘tkazishni belgilagan. Unda jarohatlarning mavjudligi, og‘irlik darajasi va kelib chiqish sabablari aniqlanishi ko‘zda tutilgan.

Abdurahmon Tashanovning fikricha, advokat bo‘yicha ekspertiza tayinlangan bo‘lsa-da, Javohir Mo‘minovga nisbatan qo‘llangani aytilayotgan qiynoqlar yuzasidan tekshiruvlar yetarli darajada olib borilmayapti. Uning ma’lum qilishicha, holat haqida O‘zbekiston Ombudsmani ham xabardor qilingan.

Javohir Mo‘minov avvalroq tovlamachilik ayblovi bilan hibsga olingan edi. “Ezgulik” jamiyati esa unga qo‘yilgan ayblovlarni rad etib, hibsga olinishi huquq himoyasi faoliyati bilan bog‘liq ekanini ta’kidlab kelmoqda.

Ayni paytda huquqni muhofaza qiluvchi organlar va boshqa rasmiy idoralar mazkur da’volar yuzasidan rasmiy munosabat bildirmagan. Shu bois keltirilgan ma’lumotlar hozircha da’vo va bayonotlar sifatida qolmoqda.