9-iyun kuni Toshkent shahrining Sergeli tumanida temiryo‘l korxonasi xodimi kanal oqimiga tushib ketgan qizning hayotini saqlab qoldi. Ma’lum qilinishicha, “Toshkent mintaqaviy temir yo‘l uzeli” filiali xodimi A’zam Ibrohimov xizmat vazifasini bajarayotgan vaqtida Qorasuv kanali bo‘yida yordam so‘rab chaqirayotgan ikki nafar qizni ko‘rib qolgan.

U darhol kanalga tushib, kuchli oqim ta’sirida xavf ostida qolgan qizlardan birini qutqarishga muvaffaq bo‘lgan. Qahramonlik ko‘rsatgan temiryo‘lchi “O‘zbekiston temir yo‘llari” AJ rahbariyati tomonidan tashakkurnoma, esdalik sovg‘asi va pul mukofoti bilan taqdirlandi.