Reuters xabariga ko‘ra, uchrashuv AQSh moliya vaziri Skott Bessent tashabbusi bilan o‘tkazilgan. Unda G7 a’zolari — Yaponiya, Buyuk Britaniya, Fransiya, Germaniya, Italiya, Kanada va AQSh moliya vazirlari, shuningdek, Avstraliya, Meksika, Janubiy Koreya va Hindiston vakillari ishtirok etgan. Shu bilan birga, AQSh savdo vakili Jeymison Grir, AQSh Eksport-import banki va JP Morgan vakillari ham qatnashgan. Ammo uchrashuv yakunlari bo‘yicha qo‘shma bayonot berilmagan.

AQSh Moliya vazirligining ma’lum qilishicha, Bessent ishtirokchilar bilan muhim minerallar, ayniqsa nodir yer elementlari bo‘yicha ta’minot zanjirlarini himoya qilish va diversifikatsiyalash yechimlarini muhokama qilishni ko‘zlagan. U mamlakatlar Xitoydan to‘liq uzilish emas, balki xavf ostidagi sohalarda qaramlikni kamaytirish yo‘lini tanlashiga umid bildirgan.

Shuningdek maqolada, Bessent uchrashuvda ishtirokchilarni Xitoyga bog‘liqlikni qisqartirish bo‘yicha sa’y-harakatlarni kuchaytirishga chaqirishini aytgani, Xitoy so‘nggi paytlarda nodir yer elementlari eksportiga qat’iy cheklovlar joriy qilib, jumladan Yaponiyaga yetkazib berishni ham cheklagani keltirilgan.

Yaponiya moliya vaziri Satsuki Katayama dushanba kuni kechqurun jurnalistlarga nodir yer elementlari bo‘yicha Xitoyga qaramlikni tezkor ravishda kamaytirish zarurligi yuzasidan kelishuv mavjudligini, u G7 va hamfikr davlatlar uchun Xitoydan tashqari manbalarni mustahkamlashga qaratilgan qisqa, o‘rta va uzoq muddatli siyosat yo‘nalishlarini belgilashini bildirgan.

• AQSh
• Hamkorlik
• Xitoy