AQSh prezidenti Donald Tramp ma’muriyati 6-noyabr kuni yangi ko‘rsatma e’lon qildi. Unga ko‘ra, endilikda ayrim sog‘lig‘ida muammosi bo‘lgan immigrantlarga viza berish to‘xtatilishi mumkin. Bu haqda CBS News xabar berdi.

Ma’lumotlarga ko‘ra, AQSh Davlat departamenti elchixona va konsulliklarga ko‘rsatma yuborgan. Ushbu hujjatda yurak va respirator kasalliklarga chalinganlar, shuningdek, saraton, diabet, ruhiy kasallik yoki ortiqcha vaznga ega bo‘lganlar “mamlakat uchun iqtisodiy yuk bo‘lishi” mumkinligi sababli viza olishdan chetlatilishi mumkinligi yozilgan.

Bu qaror Tramp ma’muriyatining muhojirlik siyosatini yanada qat’iylashtirish yo‘lidagi navbatdagi qadami sifatida baholanmoqda. U 2025-yil davomida noqonuniy muhojirlarni deportatsiya qilish, ayrim davlatlardan kelganlarga boshpana bermaslik va AQShga kirish kvotalarini keskin kamaytirish tashabbuslarini ilgari surib kelmoqda.

Yangi qoidalar deyarli barcha viza arizachilariga taalluqli bo‘ladi, ammo asosan AQShda doimiy yashashni istaganlarga nisbatan qo‘llanadi. Endilikda viza berish jarayonida nomzodning sog‘ligi, moddiy imkoniyati va oilaviy holati batafsil o‘rganiladi.

Mutaxassislar bu ko‘rsatmalar tibbiy tayyorgarligi bo‘lmagan viza xodimlariga katta vakolat berishini tanqid qilmoqda. Ularning fikricha, bunday xodimlar shaxsning kasalliklari asosida kelajakdagi tibbiy xarajatlarni taxmin qilib, noto‘g‘ri qarorlar chiqarishi mumkin.

AQShda viza olish jarayonida avvaldan tibbiy ko‘rik o‘tkazilishi shart edi, lekin yangi tartib bu jarayonni yanada keskinlashtiradi — surunkali kasalliklar, ruhiy holat va davolanish xarajatlari ham endi hisobga olinadi.

• AQSh
• Migratsiya
• taqiq