AQSHda Tramp xavfsizligiga tahdid qilgan shaxs qo‘lga olindi

2-avgust kuni AQSH prezidenti Donald Trampning tashrifi arafasida xavfsizlik xodimlari golf maydoni hududida shubhali harakat qilgan erkakni qo‘lga oldi.

Politsiya ma’lumotiga ko‘ra, erkak golf maydoni atrofida yurib, hududni foto va videoga olgan hamda xavfsizlik choralariga oid tayyorgarlik jarayonlarini kuzatgan.

Aniqlanishicha, qo‘lga olingan shaxs 38 yoshli Janin Jon Tele bo‘lib, u hibsga olingan paytda boshqa jinoyat — bosqinchilik bo‘yicha ham tergov ostida bo‘lgan.

Tintuv davomida undan o‘q-dorilar, avtomobilidan esa o‘qlangan to‘pponcha topilgan. Shuningdek, uyidan qurol-yarog‘, zirhli nimcha va huquq-tartibot idoralari tomonidan “xavotirli bayonotlar” deb baholangan yozuvlar mavjud daftarlar musodara qilingan.

Trampga avvalgi suiqasd urinishlari

2026-yilda Donald Trampga nisbatan bir necha bor suiqasd rejalari fosh etilgan. Aprel oyida Washington Hilton mehmonxonasidagi tadbir vaqtida sodir bo‘lgan otishmadan so‘ng gumonlanuvchi amaldorlarga suiqasd tayyorlaganini tan olgan.

Iyun oyida esa Federal qidiruv byurosi (FBI) Oq uyda o‘tkazilishi rejalashtirilgan UFC tadbiri vaqtida amalga oshirilishi mumkin bo‘lgan suiqasdning oldi olinganini ma’lum qilgan.

Bundan avval, 2024-yil 13-iyul kuni Pensilvaniyadagi saylovoldi mitingida Tramp qulog‘idan yaralangan, hujumchi esa Maxfiy xizmat xodimlari tomonidan otib o‘ldirilgan.

Shuningdek, 2024-yil 15-sentyabr kuni Florida shtatidagi golf klubi yaqinida yana bir suiqasd urinishining oldi olingan. Hodisa joyidan AK-47 avtomati, ryukzaklar va GoPro kamerasi topilgan, gumonlanuvchi Rayan Raut esa suiqasdga tayyorgarlik ko‘rishda ayblangan.