Ruslanbek Davletov O‘zbekiston Prezidentining vakillik organlari, nodavlat notijorat tashkilotlar va yoshlar masalalari bo‘yicha maslahatchisi lavozimidan ozod etildi. Uning o‘rniga Olim Davlatov tayinlandi. Bu haqda prezident matbuot kotibi Sherzod Asadov ma’lum qildi.

Davletov mazkur lavozimda 2025 yil iyul oyidan beri ishlab kelayotgan edi. Undan avval Prezident maslahatchisi sifatida ijtimoiy-siyosiy rivojlanish masalalari bilan shug‘ullangan.

Ruslanbek Davletov 2017 yil avgust oyida Adliya vaziri etib tayinlangan va ushbu lavozimda 2022 yil noyabr oyiga qadar ishlagan. 2022 yil 15 noyabrda u Prezidentning ijtimoiy-siyosiy rivojlanish masalalari bo‘yicha maslahatchisi etib tayinlangan.

2025 yildan boshlab Prezident administratsiyasidagi tuzilmaviy o‘zgarishlar natijasida uning vakolatlari va lavozimi qayta shakllantirilib, vakillik organlari, NNT va yoshlar masalalari yo‘nalishi belgilangan edi.

Davletovning o‘rniga tayinlangan Olim Davlatov 2022 yil aprelidan Respublika Ma’naviyat va ma’rifat markazi huzuridagi Ijtimoiy-ma’naviy tadqiqotlar instituti direktori lavozimida ishlab kelgan.

Shu tariqa Prezident administratsiyasida yana bir kadrlar o‘zgarishi amalga oshirildi.