Katta miqdordagi firibgarlik bilan kurashish bo‘yicha byuro (Serious Fraud Office, SFO) Buyuk Britaniyada Gulnora Karimovaga tegishli uchta mulkni musodara qildi. Bu haqda nazorat mahkamasi bayonotida aytiladi.

Gap Londonning nufuzli Belgravia tumanidagi ikkita kvartira va Surreydagi uy haqida bormoqda. Ularning narxi 20 million funt sterling (25 600 000 AQSh dollari)dan oshadi.

SFO bayonotiga ko‘ra, Gulnora Karimova ushbu mulkni O‘zbekistondagi korrupsion faoliyatdan tushgan mablag‘ evaziga sotib olgan.

SFO 2018-yil oktyabr oyida Karimovaning Britaniyadagi aktivlarini, jumladan, uchta mulkini musodara qilish bo‘yicha sudga murojaat qilgan. Agentlik xabariga ko‘ra, 8-avgust kuni Buyuk Britaniya Oliy sudi bu da’voni qanoatlantirdi.

Gulnora Karimova 2019-yil bahoridan beri Toshkent viloyatidagi 21-sonli koloniyada jazo muddatini o‘tamoqda. 2020-yil mart oyida Oliy sud u jinoiy guruh tashkil etish, firibgarlik, davlat mulkini o‘zlashtirish va boshqa jinoyatlarda ayblanib, 13 yil-u 4 oyga ozodlikdan mahrum etilgani haqida xabar bergan edi.

Shveysariya, Fransiya, AQSh va boshqa qator mamlakatlarda Gulnora Karimovaga aloqador aktivlarning umumiy miqdori qariyb 1,4 milliard dollarga baholanmoqda.

• Gulnora Karimova