Chernogoriya poytaxti Podgoritsada Isroilning G‘azoga uyushtirgan hujumlariga norozilik bildirish uchun ko‘p sonli odam yig‘ildi. Bu haqda “Anadulu” xabar berdi.

Qayd etilishicha, Falastin Birdamlik Harakati tomonidan uyushtirilgan namoyishda qatnashgan yuzlab kishi qo‘llarida Falastin bayroqlari bilan Chernogoriya parlament binosi tomon yo‘l olgan. Falastinda Isroil tomonidan o‘ldirilgan ayollar va bolalarning fotosuratlarini ham ko‘targan namoyishchilar, Chernogoriya hukumatidan Isroilga qarshi sanksiyalar joriy etishni talab qilgan. Shuningdek, ular AQShning Podgoritsadagi elchixonasi oldida turib, “Falastinni ozod qiling” va “genotsidni to‘xtating” degan shiorlarni aytishgan.

Namoyish tashkilotchilaridan biri Petar Markovich parlament binosi oldidagi nutqida Chernogoriya hukumati va parlamenti Falastin bilan bog‘liq aniq qadamlar tashlashi kerakligini ta’kidlagan.

Markovichning aytishicha, Isroil Falastinda genotsid qilyapti va Chernogoriya parlamenti bu borada qaror qabul qilishi kerak. Shuningdek, u Isroilga qurol yetkazib berishni to‘xtatishga chaqirdi. Namoyishda qatnashgan shoir Leyla Kasich, G‘azoda qon ketayotgan paytda siyosatchilarni Falastinga nisbatan sezgirlikni oshirishga chaqirgan.

Namoyishchilardan biri Elvis Berisha, Falastin xalqining genotsidga uchragani haqidagi haqiqatni aytish zarurligini ta’kidladi.

• Chernogoriya
• norozilik