IIV Jamoat xavfsizligi departamenti axborot xizmati xabariga ko‘ra, 13-iyun kuni kechqurun Chirchiq shahridagi tungi klublar, kafe, barlar va boshqa shu kabi ko‘ngilochar muassasalarda giyohvandlik vositalarining noqonuniy muomalasiga qarshi kurashish doirasida ichki ishlar organlari xodimlari tomonidan tezkor-profilaktik tadbirlar o‘tkazilgan.

Reyd davomida Navoiy ko‘chasida joylashgan barlardan birida huquqni muhofaza qiluvchi organlar xodimlarining e’tiborini xatti-harakatlari shubha uyg‘otgan yosh yigit tortdi. Hujjatlari tekshirilayotgan vaqtda u sezilarli darajada hayajonlangan. Xolislar ishtirokida xodimlar uning shaxsiy buyumlarini ko‘zdan kechirishganda, yigitning yonida bo‘lgan barsetka ichida o‘ziga xos o‘tkir hidga ega bo‘lgan, yashil rangli quritilgan o‘simliksimon modda solingan polietilen paket aniqlangan.

Ushbu holat yuzasidan giyohvandlik vositasi alomatlariga ega bo‘lgan moddani olib qo‘yish to‘g‘risida bayonnoma rasmiylashtirilib, to‘plangan materiallar belgilangan tartibda ro‘yxatdan o‘tkazilgan olib qo‘yilgan modda esa sud-kimyoviy ekspertizaga yuborilgan.

Sud-kimyoviy ekspertizasi xulosasiga ko‘ra, olib qo‘yilgan modda marixuana ekanligi aniqlandi. U faol giyohvand modda — tetragidrokannabinolni o‘z ichiga olgan quritilgan va maydalangan o‘simlik qismlaridan iborat bo‘lgan. Giyohvandlik vositasining umumiy og‘irligi 1,45 grammni tashkil etdi.

Mazkur holat yuzasidan Qibray tumanida yashovchi 22 yoshli fuqaroga nisbatan O‘zbekiston Respublikasi Jinoyat kodeksining 276-moddasi 1-qismi (“O‘tkazish maqsadini ko‘zlamasdan giyohvandlik vositalari, ularning analoglari yoki psixotrop moddalarni qonunga xilof ravishda tayyorlash, olish, saqlash va boshqa harakatlar”) bilan jinoyat ishi qo‘zg‘atildi.

• Departament
• Giyohvandlik
• IIV
• Jamoat xavfsizligi
• Jinoyat