AQSh  federal sudi Adliya vazirligiga Jeffri Epshteyn ishiga oid ayrim hujjatlarning tahrir qilinmagan, ya’ni yashirin qismlari olib tashlangan nusxalarini taqdim etishni buyurdi. Bu haqda ABC News xabar berdi. Ma’lum qilinishicha, sud qaroriga ko‘ra, Adliya vazirligi 2 iyulga qadar mazkur hujjatlarni oshkor qilishi yoki nima sababdan ularni to‘liq e’lon qilish mumkin emasligini tushuntirishi lozim. Sud avval ham jamoatchilikka taqdim etilgan, ammo ma’lumotlarning katta qismi qora chiziqlar bilan berkitilgan hujjatlarni qayta ko‘rib chiqishni talab qilmoqda. Xususan, ayrim elektron xatlarning jo‘natuvchilari va qabul qiluvchilari, shuningdek, ayblov hujjatlarida tilga olingan ayrim shaxslarning ismlari oshkor qilinishi mumkin.

Oshkor qilinishi kutilayotgan materiallar orasida AQSH prezidenti Donald Trampni jinsiy zo‘ravonlikda ayblagan ayolning so‘roq bayonnomalari ham mavjud. Adliya vazirligi mazkur ish yuzasidan ayrim hisobotlarni e’lon qilgan bo‘lsa-da, bayonnomalarning to‘liq matni hozirgacha ochiqlanmagan. Tramp esa unga nisbatan ilgari surilgan ayblovlarni rad etib kelmoqda. Shuningdek, hujjatlar orasida voyaga yetmagan qizlarni jinsiy ekspluatatsiya qilish bilan bog‘liq elektron xatlar ham mavjud. Ularda 14–15 yoshli qizlar haqida so‘z borgani aytilmoqda. Xatlardan birida Epshteynga yuborilgan xabarda qizlardan biri Vladimir Nabokovning mashhur «Lolita» asari qahramoniga qiyoslangan. Biroq ushbu xat muallifining shaxsi hozircha oshkor qilinmagan.

Boshqa elektron xatlarda esa Epshteynning ayrim shaxslar bilan shaxsiy muloqotlari aks etgan. Ularda turli mazmundagi yozishmalar mavjud bo‘lib, ayrimlari jamoatchilik e’tiborini tortmoqda. Adliya vazirligi avvalroq ushbu hujjatlarda federal hukumat tomonidan tekshirilmagan va tasdiqlanmagan ma’lumotlar ham mavjudligini bildirgan. Xususan, Trampga nisbatan bildirilgan ayrim ayblovlar «asossiz va yolg‘on» ekani ta’kidlangan.