Efiopiyaning janubida xavfli virus tarqala boshladi. Mutaxassislarning aytishicha, virusdan o‘lim darajasi 25–80 foizgacha yetadi. Bu haqda Afrika kasalliklarni nazorat qilish va oldini olish markazlariga tayanib, The Guardian xabar berdi.

Marburg — eng xavfli gemorragik viruslardan biri bo‘lib, bemorda kuchli qon ketishi, yuqori isitma, qusish va diareya kabi og‘ir alomatlarni keltirib chiqaradi. Uning inkubatsiya davri 21 kungacha davom etishi mumkin.

Jahon sog‘liqni saqlash tashkiloti rahbari Tedros Adanom Gebreyesus mamlakatda hozircha to‘qqizta kasallanish holati aniqlanganini ma’lum qildi. Efiopiya milliy laboratoriyasi virusning mavjudligini tasdiqlagan, u ilgari Sharqiy Afrikada qayd etilgan shtammlarga o‘xshash ekani aytilmoqda.

Mamlakat rasmiylari Jinka hududida epidemiologik surishtiruv va virus tarqalishini jilovlash choralarini boshlab yuborgan. Yil boshida Tanzaniyada Marburg virusi tarqalishi oqibatida 10 kishi vafot etgan, mart oyida esa epidemiya to‘xtatilgan. Ruandada 2024-yilda ushbu virusdan 15 kishi halok bo‘lgandi.

Virusga qarshi tayyor vaksina hali mavjud emas. Biroq simptomlarni yengillashtirish va suvsizlanishning oldini olish bemorlarning omon qolish ehtimolini oshiradi.

• Afrika
• Virus