Yo‘l harakati xavfsizligini ta’minlash sohasini yanada rivojlantirishga doir yangi qaror qabul qilindi. O‘zbekiston Respublikasi Prezidentining “Avtomobil yo‘llarida inson xavfsizligini ishonchli ta’minlash va o‘lim holatlarini keskin kamaytirish chora-tadbirlari to‘g‘risida”gi qaroriga muvofiq:

– tuman (shahar) hokimliklariga, shu jumladan, davlat-xususiy sheriklik asosida jalb qilingan investorlarga tegishli maxsus avtomatlashtirilgan foto va video qayd etish dasturiy-texnik tizimlari orqali qayd etilgan yo‘l harakati qoidabuzarliklaridan undirilgan jarima summasini taqsimlashning quyidagi tartibi joriy etilsin:

a) tuman (shahar) hokimliklari tomonidan o‘rnatilgan maxsus avtomatlashtirilgan foto va video qayd etish dasturiy-texnik tizimlari joriy etilib, ishga tushirilgan kundan boshlab:

30 foizi – bevosita tuman (shahar) mahalliy byudjetiga, mazkur mablag‘lar yo‘l harakatini raqamlashtirish, yo‘l infratuzilmasini rivojlantirishga, yo‘l-patrul xizmati xodimlarining qo‘shimcha shtatlarini kiritishga maqsadli yo‘naltiriladi;

50 foizi – O‘zbekiston Respublikasining respublika byudjetiga;

10 foizi – O‘zbekiston Respublikasi Ichki ishlar vazirligining byudjetdan tashqari jamg‘armasiga;

5 foizi – O‘zbekiston Respublikasi Ichki ishlar vazirligining Jamoat xavfsizligi departamenti Yo‘l harakati xavfsizligi xizmati DYHXX moddiy texnika bazasini rivojlantirish, xodimlarni rag‘batlantirish va mukofotlash jamg‘armasiga;

5 foizi – O‘zbekiston Respublikasi Davlat xavfsizligi xizmati huzuridagi “Kiberxavfsizlik markazi” davlat unitar korxonasiga;

b) davlat-xususiy sheriklik asosida jalb qilingan investorlar tomonidan o‘rnatilgan maxsus avtomatlashtirilgan foto va video qayd etish dasturiy-texnik tizimlari joriy etilib, ishga tushirilgan kundan boshlab, davlat-xususiy sheriklik to‘g‘risidagi bitimning amal qilish muddatigacha:

30 foizi – bevosita tuman (shahar) mahalliy byudjetiga, mazkur mablag‘lar yo‘l harakatini raqamlashtirish, yo‘l infratuzilmasini rivojlantirishga, yo‘l-patrul xizmati xodimlarining qo‘shimcha shtatlarini kiritishga maqsadli yo‘naltiriladi;

25 foizi – davlat-xususiy sheriklik asosida jalb qilingan investorlarning hisobvarag‘iga;

20 foizi – O‘zbekiston Respublikasining respublika byudjetiga;

10 foizi – O‘zbekiston Respublikasi Ichki ishlar vazirligining byudjetdan tashqari jamg‘armasiga;

10 foizi – O‘zbekiston Respublikasi Ichki ishlar vazirligining Jamoat xavfsizligi departamenti Yo‘l harakati xavfsizligi xizmati DYHXX moddiy texnika bazasini rivojlantirish, xodimlarni rag‘batlantirish va mukofotlash jamg‘armasiga;

5 foizi – O‘zbekiston Respublikasi Davlat xavfsizligi xizmati huzuridagi “Kiberxavfsizlik markazi” davlat unitar korxonasiga yo‘naltiriladi.

• DXX
• Qaror
• Radar
• YHXB