Kecha 3-may kuni Respublikaning aksariyat hududlarida kuchli yog‘ingarchilik holatlari kuzatildi. Xususan poytaxt bo‘ylab ham kuchli yomg‘ir yog‘di. Natijada ijtimoiy tarmoqlarda “Chorsu” metro bekatiga tegishli hududni suv bosgani aks etgan videolar tarqaldi. Mazkur holat yuzasidan FVV rasmiy munosabat bildirdi.

“Shu soatlarda, ijtimoiy tarmoqlarda kuchli yomg‘ir natijasida suv oqimlari “Chorsu” metro bekati tomon oqib kelayotgani aks etgan kadrlar tarqaldi. Ta’kidlash joizki, suvning katta qismi irrigatsiya-drenaj tizimi orqali tabiiy ravishda chiqib ketgan.

Suv to‘planishining oldini olish maqsadida Toshkent shahar Favqulodda vaziyatlar bosh boshqarmasi kuch va vositalari jalb etildi. Ayni vaqtda metro bekati shtat rejimida ishlamoqda, poyezdlar belgilangan jadval asosida harakatlanmoqda”, – deyiladi FVV xabarida.

• Metro
• Toshkent
• yomg‘ir