Germaniya prokuraturasi tadbirkor Alisher Usmonovga nisbatan sanksiyalarni buzish bo‘yicha olib borilgan ikkinchi tergovni to‘xtatdi va unga qo‘yilgan ayblovlarni bekor qildi.

Ma’lum bo‘lishicha, Myunxen prokuraturasi YeI sanksiyalarini buzganlikda gumon qilinib ochilgan ishni yopish to‘g‘risida qaror qabul qilgan. Alisher Usmonov ish doirasida o‘ziga qo‘yilgan aybni tan olmagan, biroq Germaniya qonunchiligiga muvofiq xayriya maqsadida ixtiyoriy to‘lov amalga oshirgan. Uning advokatlari bildirishicha, ushbu epizod bo‘yicha tergovni qayta tiklash mumkin emas va biznesmenga nisbatan aybsizlik prezumpsiyasi saqlanib qoladi.

Tergov organlari Usmonovni 2022-yilda Germaniyadagi ko‘chmas mulk obyektlarini qo‘riqlash xizmatlari uchun to‘lov qilganlikda hamda ayrim aktivlarni deklaratsiya qilmaganlikda gumon qilgan. Himoya tomoni esa uning bu kompaniyalar va mulkka aloqadorligini rad etgan. Natijada ish dalillar yetarli emasligi sababli tugatilgan.

• Alisher Usmonov
• Germaniya