Turkiya harbiy yuk samolyoti Gruziya chegarasida qulab tushdi. Bu haqda Daily Sabah xabar berdi.

Samolyot Ozarbayjondan Turkiyaga qaytayotgan bo‘lgan. Turkiya mudofaa vazirligi bayonotida aytilishicha, C-130 rusumli samolyot bortida 20 nafar harbiy xizmatchi, jumladan uchuvchilar ham bo‘lgan. Hozirda Gruziya hukumati bilan hamkorlikda qidiruv-qutqaruv ishlari olib borilmoqda. Halok bo‘lganlar yoki omon qolganlar haqida rasmiy ma’lumot berilmagan.

Gruziya Ichki ishlar vazirligi ham hodisani tasdiqlagan. Ma’lumotlarga ko‘ra, samolyot Ozarbayjon chegarasidan taxminan 5 kilometr masofada Gruziya hududiga qulagan. Hodisa yuzasidan tergov boshlangan.

Turkiya prezidenti Rajab Toyyib Erdo‘g‘an Anqarada bo‘lib o‘tgan tadbirda aviahalokat haqida gapirib, qurbonlarning oilalariga hamdardlik bildirgan.

“Biz samolyot qoldiqlarini tekshirish uchun tegishli idoralar bilan hamkorlikda ish olib boryapmiz”, – degan Erdo‘g‘an.

• Aviahalokat
• Gruziya
• Samolyot
• Turkiya