Hamyoningizni o‘zgartirgan zahoti topish-tutishingizda o‘zgarish ro‘y berganini sezganmisiz? To‘satdan ishlaringiz yurishib, boyligingiz ko‘paya boshladimi? Yoki aksincha ishlaringiz orqaga keta boshladimi? Balki bunga ayollar va erkaklar uchun muhim aksessuar bo‘lmish hamyon qaysidir ma’noda o‘z ta’sirini o‘tkazgandir. Gap shundaki, pullarni saqlash vazifasini bajaruvchi bu muhim aksessuar o‘ziga xos quvvat manbayi sanaladi. Masalan, ayollar pul chaqiradi, deb ko‘pincha qizil rangdagi hamyon sotib olishga harakat qilishadi. Aslida ham shundaymi? Keling, bugun shu haqda so‘z yuritamiz.

Qora rangli hamyon

Qora rang – barqarorlik va ishonch ramzi. Bunday aksessuar an’anaviy qarashlarga ega, konservatizmni qo‘llab-quvvatlovchilar tanlovi. Qora rangli hamyonning tabiiy material – charm va zamshdan tikilganini sotib oling.

Qizil rangli hamyon

Bu rang – moliyaviy to‘kinlik ramzi. Biroq yumshoq qalbli insonlar uchun juda xavfli. Ularning quvvatini so‘rib olishi mumkin. Biroq u o‘ziga ishongan, yorqin xarakterli shaxslar uchun juda mos keladi. Qizil rangli hamyon tanlaganda u, albatta, qimmatbaho bo‘lishiga e’tibor qarating.

Oq rangli hamyon

Oq rang – ustunlik ramzi. Turkiy xalqlarda badavlat va aslzoda insonlar oq rangli yaktak va bosh kiyim kiyishgan. Shunday ekan, boyligingizni ko‘paytirish uchun oq rangli hamyonni bemalol sotib olishingiz mumkin. Uni oq rangdagi biror kiyim bilan moslab tutish kerak.
 
Sariq rangli hamyon

Bu rang xotirjam fe’lli, qanoatli odamlar tanlovi. Ularga pul keladi, biroq o‘lchangan miqdorda. Ammo moliyaviy ahvoli muntazam yaxshilanib borishini kutmaganlari ma’qul. Ammo barqarorlik ularga, albatta, nasib etadi.

Yashil rangli hamyon

Yashil rangli hamyonni tanlaganda uning och yoki to‘qligiga e’tibor bering. Iloji boricha to‘qroq rangdagisini tanlang. Ana shunda samarasi darhol seziladi.

Ko‘k va havorangli hamyon

Ushbu ranglardagi hamyonni iloji boricha sotib olmaslikka harakat qiling. Ularda pul uzoq turmaydi. Goh kutilmagan xarajatlar chiqib qoladi, goh yo‘qotishlar.

Tug‘ilgan kunga moslab hamyon tanlash
Raqamshunoslar tug‘ilgan kun odamning taqdiri va uni o‘rab turgan olamga o‘z ta’sirini ko‘rsatishini aniqlagan. Xususan, sizga qaysi rangdagi hamyon mos tushishini ham tavallud sanangizga qarab aniqlash mumkin. Bir xonali son ostida tug‘ilganlar o‘z raqamlariga mos javobni o‘qishadi. Tug‘ilgan sanasi ikki xonali son bo‘lganlarning esa raqamlari bir-biriga qo‘shiladi. Masalan, siz 16-sanada tug‘ilgan bo‘lsangiz, 1+6=7 qo‘shuv amalidan so‘ng 7-raqamli javobni o‘qiysiz.
 
Endi javoblar bilan tanishing:
1. Bronza va tillarang hamyon;
2. Oq yoki yashil rangli hamyon;
3. Pushti va binafsharang hamyon;
4. Kulrang hamyon;
5. Sariq yoki kulrang hamyon;
6. Tiniq osmon va olovrang hamyon;
7. Yashil yoki ko‘k rangli hamyon;
8. Qora yoki to‘q ko‘k rangli hamyon;
9. Qizil rangli hamyon.
Unutmang! Boylik keltiradigan hamyon har doim yuqori sifatli va qimmatbaho bo‘lishi kerak.

• Tavsiya
• moda
• qiziqarli