AQShning Long Aylend shahrida yashovchi 68 yoshli fuqaro o‘zining BMW avtomobili eshigiga bosh barmog‘ini qattiq qisib oldi. Natijada jiddiy jarohat olgan barmoqning yarmi uzilib tushgani uchun mashina egasi BMW kompaniyasidan 1,9 million dollar miqdorida tovon puli oldi.

Voqea 2016-yilda sodir bo‘lgan. Amerikalik dasturchi Godvin Boateng o‘sha vaqtlar eshigi asta yopiladigan funksiyaga ega BMW X5 avtomobilini boshqarar edi. Mashina egasi kasalxonaga yotqizilgach, shifokorlar barmoqni qayta o‘z holiga qaytarishning iloji yo‘qligini aytishgan.

Tekshiruvlar natijasida ma’lum bo‘lishicha, kompaniya bunday noxush hodisalarning aniq sonini yashirib kelgan. Sud davomida BMW avtomobil eshigi tufayli atigi bir necha kishi jarohatlanganini da’vo qildi, lekin aslida butun dunyo bo‘ylab ohista yopiladigan funksiyali eshikdan kelib chiqqan jarohatlar bilan bog‘liq kamida 44 ta holat qayd etilgan.

Jabrlanuvchiga tovon puli to‘lash to‘g‘risidagi qaror sud tomonidan qabul qilindi. Qayd etilishicha, Boateng bunday hukmdan juda mamnun.

Jarohat tufayli Godvin yozish va ovqatlanishni qayta o‘rganishga, shuningdek, sevimli xobbisi bo‘lgan tennis mashg‘ulotlaridan voz kechishga majbur bo‘lgan.

• BMW
• qiziqarli