Hindiston ilm-fan instituti mutaxassislari tishning zararlangan va stomatologlar “etib bora olmaydigan” sohalarini davolovchi nanorobotlar ixtiro qilishdi.

Mutaxassislarning taʼkidlashlaricha, tishlarning ildiz kanallarini davolash vaqtida shifokorlar infeksiyadan zararlangan yumshoq tish toʻqimalari (pulpa) ni olib tashlashadi, shundan keyin sohani bakteriyalarga qarshi taʼsir koʻrsatuvchi preparatlar bilan yuvishadi. Ammo, zararlangan sohadagi bakteriyalardan toʻlaligicha xalos boʻlish imkonsiz, patogenlar esa antibiotiklar taʼsiriga nisbatan chidamli boʻladi.

Olimlar tomonidan ixtiro qilingan nanorobotlar kremniy va temir dioksididan tayyorlangan boʻlib, magnit maydon yordamida boshqariladi. Mitti robotlarga “Theranautilus” deb nom berilgan. Ular tish toʻqimalarining ichiga 2000 mikrometr chuqurlikda kirib bora oladi. Shifokorlar bu turdagi nanorobotlardan foydalanish kimyoviy moddalar va antibiotiklarni qoʻllashga nisbatan xavfsizroq ekanligini aytib oʻtishgan.

Mutaxassislar “Theranautilus” ni allaqachon sinovdan oʻtkazib koʻrishgan. Tadqiqotlar undan foydalanishning mutlaqo xavfsiz ekanligini koʻrsatgan.

Ekspertlar endilikda robotning ogʻiz boʻshligʻida osonlikcha harakatlanishiga yordam beruvchi mexanizm yaratish ustida ish olib boradilar. Ushbu mexanizm “Theranautilus” ni tish toʻqimalari ichiga kiritish va uni boshqarish vazifasini bajaradi.

• Hindiston
• Tibbiyot
• ixtiro
• salomatlik