Bugun, 28-aprel kuni Qashqadaryo viloyatiga oid xabarlarni berib boruvchi “Nasafnews” internet nashri muxbiri IIB xodimlari tomonidan viloyat hokimligiga olib ketilgan.

Maʼlum bo‘lishicha, muxbirlar ishlayotgan ofisga IIV va terrorizmga qarshi kurash boshqarmasida ishlashini aytgan xodimlar bostirib kelgan va xodimlardan biri sayt bosh muharririni majburiy tartibda olib ketishga harakat qilgan.

Bu haqda maʼlum qilgan nashr muxbiri xodimlarning qo‘lida hech qanday asos va chaqiruv xati yo‘qligini yozib qoldirgan.

Mahalliy blogerlardan birining yozishicha, u “Nasafnews” bosh muharriri bilan bir muddat oldin gaplashganida unga o‘zini vazir o‘rinbosari “Saidkarim” ekanini aytib tanishtirgan kishi, suhbatga chaqirganini, ammo u bu chaqiruv rasmiy bo‘lishi kerakligini yoki uning o‘zi ofisga kelishi mumkinligini aytganini bildirgan. Bir muddat o‘tib esa yuqoridagi holat sodir bo‘lgan.

IIV Matbuot kotibi Shoxruh G‘iyosov ushbu vaziyatga munosabat bildirib, muxbir D.Nabiyevning sayt ofisiga IIO xodimlari bostirib kirgani haqidagi iddaolarini “haqiqatdan yiroq” deb ataydi va muxbir shunchaki, “viloyat hokimiyatiga suhbatga taklif etilgan”ligini aytadi.

Shuningdek, G‘iyosov ijtimoiy tarmoq faollaridan “korporativ etika”ni qurol qilib, yolg‘on maʼlumotlarni tarqatishdan tiyilishlarini so‘raydi.

Xabardor.uz G‘iyosovning vaziyatga munosabati bo‘yicha Qashqadaryo viloyati hokimligi Matbuot kotibidan nashr muxbirining nega hokimlikka chaqirilgani yuzasidan izoh olishga urindi. Hokimlik matbuot kotibi Sodiqovning aytishicha, D.Nabiyevni viloyat hokimligi matbuot kotibi, qolaversa, viloyatdagi OAV vakillari hamda blogerlarning rahbari sifatida o‘zi chaqirgan va bunda hech qanday majburlov holatlari bo‘lmagan.

Bir qaraganda IIV hamda Qashqadaryo viloyati hokimligining Matbuot kotiblari bergan maʼlumotlar “bir joydan chiqdi”. Ammo...

“Hurmatli do‘stlar hozircha hammasi joyida.

Ammo IIV matbuot kotibi Shoxruh G‘iyosovning iddaosiga tushunmadim, u meni yolg‘onchilikda ayblamoqda.

Xonamga IIB va terrorizmga qarshi kurash boshqarmasidanmiz deb kelgan xodimlarning videosini eʼlon qilaman.

G‘iyosov doimgidek, Toshkentda o‘tirib olib, mahalliy jurnalistlarni g‘iybatchilikda ayblashga urinmoqda. Va u bu xatti-harakati uchun javob berishi kerak.

Yolg‘on axborot tarqatishga javobgarlik bor ekanini eslatishga usta matbuot kotibining o‘ziga buni eslatib qo‘yish kerak, chog‘i”, – deb yozib qoldirdi Dilshod Nabiyev o‘zining telegramdagi kanalida.

U, shuningdek, haqiqatda hokimlik binosida uni IIV vaziri o‘rinbosari polkovnik Saidkarim Nishanbayev kutib turganini va u bilan suhbati do‘stona o‘tganini bildirgan.

“Uning (vazir o‘rinbosarining, -tahr.) fikrlashi menga yoqdi. Do‘stona suhbat qilish uchun chaqirgan ekan, ammo uning ortidagilar buni noto‘g‘ri tushunib, bostirib kelishibdi.

Saidkarim akaning bugun menga aytgan fikrlarini hurmat qilaman, haqiqatan jurnalistlarga ochiq odam ekan”, – deb yozadi nashr muxbiri.

Ana endi vazirlik Matbuot kotibiga qator savollar (jumladan, viloyat hokimligi matbuot xizmatiga ham) paydo bo‘ladi: IIO xodimlarining tahririyat binosiga bostirib kirishi holati bo‘lganini yashirish bu tizim rivoji yoki obro‘si uchun muhimmi? Umuman, buni bugungi texnik imkoniyatlar rivojlangan davrda yashirish mumkinmi?

Nabiyevning iddaosiga ko‘ra, “bu sayt xodimlariga qilingan birinchi bosim emas”. Nega ushbu tahririyat xodimlariga nisbatan bosimlarga ko‘z yumilyapti?..

• G‘iyosov
• IIV
• Matbuot
• Munosabat
• Qashqadaryo