Anor sharbati – immunitetni mustahkamlash, gemoglobin miqdorini oshirish, tanaga quvvat bagʻishlashda eng foydali ichimlik hisoblanadi. Bu haqida tibbiyot fanlari nomzodi Rimma Moysenko maʼlum qildi.

“Anor sharbati qadimdan eng foydali ichimliklardan hisoblab kelingan. Uning tarkibida katta miqdorda antioksidantlar va antotsianlar – immunitetni mustahkamlovchi faol moddalar mavjud. Bu immunitetni ragʻbatlantiruvchi tabiiy vosita”, – deydi ekspert.

Mutaxassisning aytishicha, anor sharbati ichaklar faoliyatini yaxshilaydi. Buning natijasida inson kuch-quvvatni his etadi. Ichimlik tarkibida D, E, K vitaminlari, yarimtoʻyingan yogʻ kislotalari ham bor. Ular qondagi gemoglobin miqdorini koʻtarish va anemiyaga qarshi kurash jarayonida ishtirok etadi.

Anor sharbatini uy sharoitida mustaqil tayyorlash mumkin. Buning uchun meva sharbatini siqib olib, uni ozroq suv bilan aralashtirish va oradan yarim soat oʻtib isteʼmol qilish kerak. Tayyor sharbatlar tarkibiga katta miqdorda shakar qoʻshilgani uchun ularning foydasidan koʻra zarari koʻproq boʻladi.

• Foydali
• Tavsiya
• salomatlik