“Uzbekistan Airports”ning xabar berishicha, Eron ustidagi havo hududining yopilishi munosabati bilan aviakompaniyalar parvoz yo‘nalishlarini o‘zgartirgan.

Qayd etilishicha, “Jazeera Airways” aviakompaniyasining Toshkent-Quvayt yo‘nalishi bo‘yicha J9-1650 reysi soat 04:50 da uchib, Toshkent aeroportiga qaytgan va soat 07:06 da jo‘nash aeroportiga qo‘ngan.

Shuningdek, “Fly Dubai” aviakompaniyasining Dushanbe-Dubay yo‘nalishi bo‘yicha FZ-778 reysi ekipaji Toshkentdagi muqobil aerodromga yo‘l olishga qaror qilgan. Samolyot mahalliy vaqt bilan soat 08:32 da Toshkentga kelib qo‘ngan. Ekipajning dam olishi munosabati bilan Toshkentdan uchish mahalliy vaqt bilan soat 21:00 ga belgilangan. Yo‘lovchilarning mehmonxonaga joylashtirilishi belgilangan.

“Fly Dubi” aviakompaniyasining Toshkent-Dubay yo‘nalishi bo‘yicha FZ-1942 reysi ham soat 04:58 da havoga ko‘tarilib, 06:58 da Ashxoboddagi muqobil aerodromga qo‘ngan.

“Centrum Air” aviakompaniyasining Jidda-Toshkent yo‘nalishi bo‘yicha C6-702 reysi ham xuddi shu sabab bilan Ar-Riyoddagi muqobil aerodromga qo‘ngan. Shuningdek, Madina-Farg‘ona yo‘nalishi bo‘yicha C6-3336 reysi ham Toshkent vaqti bilan soat 08:17 da Al-Maktum (Dubay) aeroportiga qo‘ngan.

Shuningdek, marshruti Eron havo hududi orqali amalga oshiriladigan bir qator reyslar O‘zbekiston shaharlaridan kechikish bilan uchgan.

Eslatib o‘tamiz, bugun, 26-oktyabr tonga yaqin Isroil Eronga havo hujumi uyushtirgan va 100 dan ortiq raketa uchirgandi. Eron havo hududini yopib, keyingi ogohlantirishgacha barcha reyslarni bekor qilganini e’lon qildi.

• Aeroport
• Eron
• Isroil