Singapur hukumati aholini ijtimoiy tarmoqlarda uzoq vaqt o‘tkazishdan qaytarish va kitob o‘qishga rag‘batlantirish maqsadida yangi dastur ishga tushirdi. Unga ko‘ra, har kuni kamida 15 daqiqa kitob o‘qigan fuqarolar virtual tangalar bilan mukofotlanadi.

Dastur sentyabr oyidan boshlab amal qilmoqda. Ishtirokchilar maxsus davlat sayti orqali o‘qishga sarflagan vaqtini qayd etadi. 15 daqiqa yoki undan ko‘proq kitob o‘qigan foydalanuvchiga 20 ta virtual tanga beriladi.

1000 ta virtual tanga jamg‘argan ishtirokchi 1 Singapur dollariga ega bo‘ladi. Bu taxminan 80 AQSH sentiga teng. Bir sutkada faqat bitta o‘qish sessiyasi hisobga olinadi. Shu sababli har kuni 15 daqiqadan kitob o‘qigan kishi 50 kunda 1 Singapur dollar ishlab olishi mumkin.

Singapur Milliy kutubxona kengashi rahbari Melissa Tamning ta’kidlashicha, muntazam kitob o‘qish odatini shakllantirish uchun katta maqsadlardan ko‘ra, kichik va bajarish oson bo‘lgan qadamlar samaraliroq bo‘lishi mumkin.

Dastur, shuningdek, aholining ijtimoiy tarmoqlardan foydalanish odatlariga ham e’tibor qaratadi. Singapur hukumati, xususan, yoshlar orasida ijtimoiy tarmoqlardan foydalanishni cheklash bo‘yicha turli choralarni ko‘rib chiqmoqda. Takliflar orasida kunlik foydalanish vaqtiga limit o‘rnatish ham bor.

Mutaxassislar yoshlar orasida ijtimoiy tarmoqlarga qaramlik va “doomscrolling” — salbiy yoki xavotirli yangiliklarni uzluksiz kuzatib borish holati keng tarqalayotganini qayd etgan.

Shu bilan birga, Singapur yoshlarining o‘qish savodxonligi ko‘rsatkichlari yuqori. 2025-yilgi PISA xalqaro baholashida mamlakatning 15 yoshli o‘quvchilari o‘qish savodxonligi bo‘yicha yuqori natija qayd etgan.

Shunday qilib, Singapurda yangi dastur kitob o‘qishni nafaqat foydali odat, balki kichik moliyaviy rag‘bat bilan ham qo‘llab-quvvatlashga qaratilgan.