Yaponiyada noodatiy musobaqa — uxlash bo‘yicha tanlov o‘tkaziladi. Matraslari bilan tanilgan Koala Japan kompaniyasi tashkil etayotgan tadbirda ishtirokchilar 90 daqiqa davomida uxlashi kerak bo‘ladi.

Musobaqa 5 oktabr kuni Tokioda bo‘lib o‘tadi. Ishtirokchilarning uyqu sifati maxsus uskunalar yordamida baholanadi. Unda uyquning chuqurligi, ishtirokchining qanchalik tez uxlab qolgani va uyqu holatining barqarorligi kabi ko‘rsatkichlar o‘lchanadi.

Mazkur mezonlar asosida tanlov g‘olibi aniqlanadi. Bosh mukofot 2,22 million iyena, ya’ni joriy kurs bo‘yicha qariyb 14,3–14,4 ming dollarni tashkil etadi.

Mukofot summasi ham bejiz tanlanmagan. 2,22 million iyena miqdori ommaviy madaniyatda uyquni ifodalovchi “Zzz” tovushiga ishora qiladi.

Tanlov doirasida qo‘shimcha nominatsiyalar ham mavjud. Jumladan, eng chuqur uyqu va dam olish vaqtida eng noodatiy yoki “akrobatik” holatda uxlash bo‘yicha ham g‘oliblar aniqlanadi.