Qirg‘izistonda prezidentlik saylovlarini o‘tkazish sanasi o‘zgartirildi. Jogorku Kenesh reglamentiga kiritilgan tuzatishga ko‘ra, avval belgilangan oktyabr oyining uchinchi yakshanbasi o‘rniga prezidentlik saylovlari yanvar oyining to‘rtinchi chorshanbasida o‘tkaziladi.

Tegishli o‘zgartirishni Qirg‘iziston Prezidenti Sadir Japarov imzolagan. Tuzatish parlament reglamentining 132-moddasiga kiritildi.

Qayd etilishicha, saylov sanasi avvalroq prezidentlik saylovlari to‘g‘risidagi konstitutsiyaviy qonunda ham o‘zgartirilgan. Biroq Jogorku Kenesh reglamentida eski tartib saqlanib qolgan edi. Yangi tuzatish orqali ikki hujjatdagi normalar o‘zaro muvofiqlashtirildi.

Amaldagi qonunchilikka ko‘ra, navbatdagi prezidentlik saylovi amaldagi davlat rahbarining vakolat muddati tugaydigan yilning yanvar oyidagi to‘rtinchi chorshanbasida o‘tkaziladi. Ushbu tartibga muvofiq, Qirg‘izistonda navbatdagi prezidentlik saylovi 2027-yil 27-yanvar, chorshanba kuni bo‘lib o‘tadi.

Parlament saylovni ovoz berish kuniga kamida to‘rt oy qolganda tayinlashi kerak.

Ma’lumot uchun, Qirg‘izistonda oxirgi prezidentlik saylovi 2021-yil 10-yanvar kuni muddatidan oldin o‘tkazilgan. Saylov 2020-yilgi parlament saylovlaridan keyingi siyosiy inqiroz hamda o‘sha paytdagi prezident Sooronbay Jeenbekovning iste’fosidan so‘ng tashkil etilgan.

O‘sha saylovda Sadir Japarov 79,2 foiz ovoz bilan prezident etib saylangan. Saylovchilarning 39,7 foizi ovoz berishda qatnashgan.