AQSHda samolyot bortida tartibsizlik chiqargan 67 yoshli yo‘lovchi ekipaj va boshqa yo‘lovchilar tomonidan o‘rindig‘iga yopishqoq lenta hamda plastik bog‘ichlar yordamida mahkamlangan. Bu haqda The Guardian xabar berdi.

Voqea 3-sentyabr kuni American Airlines aviakompaniyasining Dallasdan Nyu-Jersi shtatidagi Nyuark shahriga uchayotgan 618-reysida sodir bo‘lgan. Parvoz vaqtida Leyn Lundin yo‘lovchilar va ekipaj a’zolarini haqorat qilgan hamda janjal ko‘targan.

Vaziyat keskinlashgach, samolyot Baltimor/Vashington Turgud Marshall xalqaro aeroportiga favqulodda qo‘nishga yo‘naltirilgan. Samolyot qo‘ngach, Lundin hibsga olingan.

Unga ikkinchi darajali hujum va tartibsizlik sodir etish bilan bog‘liq ayblovlar qo‘yilgan. Sudda ayblovlar o‘qib eshittirilganida Lundin voqealarni eslay olmasligini aytgan.

Hodisaga aralashgan sobiq huquq-tartibot xodimi Xuan Mexianing so‘zlariga ko‘ra, Lundin aviakompaniya xodimlari va boshqa yo‘lovchilarga nisbatan qo‘pol, irqiy va ayollarga nisbatan haqoratli so‘zlar ishlatgan.

Yana bir yo‘lovchi Richard Olenik esa Lundin yonidagi yo‘lovchini va vaziyatni tinchlantirishga uringan ayolni urishga harakat qilganini bildirgan. Uning aytishicha, yo‘lovchini yopishqoq lenta bilan mahkamlash harakatlarini cheklagan bo‘lsa-da, Lundin qarshilik ko‘rsatishda davom etgan.

Samolyot qo‘ngach, huquq-tartibot xodimlari Lundinni hibsga olgan va unga nisbatan tegishli choralar ko‘rilgan.