Malayziya kompaniyasi yangi Toshkentda quyosh panellarini o‘rnatishni rejalashtirmoqda. Bu haqda “Dunyo” AA xabar berdi.

O‘zaro hamkorlik istiqbollari O‘zbekiston Respublikasi elchisi Karomiddin Gadoyevning Malayziyaning “Sunview Group” kompaniyasi bosh direktori Ong Xang Ping bilan uchrashuvi chog‘ida muhokama qilindi.

“Ong hang Ping yangi Toshkentda qurilayotgan yirik binolarning tomlariga o‘rta quvvatli quyosh panellarini o‘rnatish, shuningdek, Qashqadaryo viloyati suv ta’minoti nasos stansiyalarini qayta tiklanadigan energiya manbalari bilan ta’minlash bo‘yicha loyihalarni amalga oshirishda O‘zbekiston tomoni bilan hamkorlik qilishga tayyorligini bildirdi”, — deyiladi xabarda.

Bundan tashqari, malayziyalik tadbirkor joriy yil oxirigacha Farg‘ona viloyatida 200 MVt quvvatga ega quyosh elektr stansiyasini qurish loyihasini ishga tushirishga tayyorligini bildirdi. Shuningdek, hozirda Andijon viloyatida 400 MVt quvvatga ega quyosh elektr stansiyasini qurish uchun tegishli yer uchastkalari belgilanmoqda.

Hozirgi vaqtda kompaniya mutaxassislari ushbu loyihalar ustida ishlashni boshlash uchun respublikada uzoq muddatli xizmat safarida.

• Malayziya
• O‘zbekiston
• quyosh batareyalari