SpaceX asoschisi Ilon Mask tarixda birinchi bo‘lib boyligi 600 milliard dollardan oshgan inson sifatida rekord o‘rnatdi. Oktyabr oyida u boyligi 500 milliard dollarga yetgan ilk odam bo‘lgandi. Bu haqda Forbes jurnali xabar berdi.

Nashrga ko‘ra, Mask dunyodagi ilk trillionerga aylanish sari yana ulkan qadam tashladi. Dekabr o‘rtalarida u asos solgan SpaceX kompaniyasi o‘z qiymatini 800 milliard dollarga baholagan. Baholash 2026-yilda rejalashtirilayotgan SpaceX IPO‘si oldidan amalga oshirilgan. Aksiyalar joylashtirilishi tarixdagi eng yirik IPO bo‘lishi mumkinligi qayd etilgan.

Mazkur baholash Maskning boyligini, unga SpaceX aksiyalarining taxminan 42 foizi tegishli ekanini hisobga olganda, 168 milliard dollarga oshirib, qariyb 677 milliard dollarga yetkazgan. 

IPO o‘tkazilmagan taqdirda ham Maskni trillionerga aylantirishi mumkin bo‘lgan SpaceX’dagi ulushi hozir uning eng qimmat aktividir: bu ulush 336 milliard dollarga baholanmoqda. Shu bilan birga, Maskning Tesla’dagi 12 foizlik ulushi 197 milliard dollarga teng. Bundan tashqari, Maskga tegishli bo‘lgan xAI Holdings kompaniyasi (sun’iy intellekt asosidagi Grok chat-botini rivojlantiradi) hozirda 230 milliard dollar baho bilan yangi investitsiyalar jalb etish bo‘yicha muzokaralar olib bormoqda. Bu Mask kompaniyani tashkil qilgan paytda aytgan 113 milliard dollarlik bahodan ikki barobardan ko‘pdir.

2024-yilda nforma Connect Academy tahliliy guruhi Mask 2027-yilga borib tarixdagi ilk dollar trillioneriga aylanishi mumkinligini bashorat qilgan edi. Mutaxassislar buni Mask boyligi yiliga o‘rtacha 110 foizga oshib borayotgani bilan izohlagan. Mask ilk bor 2021-yilda Forbes talqiniga ko‘ra dunyoning eng boy odami bo‘lgan va Amazon asoschisi Jeff Bezosni ortda qoldirgan edi. O‘shanda jurnal uning boyligini 271,3 milliard dollar deb baholagan.

• Boylik
• Forbes
• Ilon_Mask