2023−2024-yillarda Tashqi mehnat migratsiyasi agentligiga, shuningdek, 2025-yilda Migratsiya agentligiga xorijga ishga yuborish xizmatlari uchun to‘lov qilgan, ammo xorijiy ish beruvchi tomonida yuzaga kelgan ayrim tashkiliy yoki boshqa holatlar tufayli ishga jo‘nab ketmagan fuqarolar mablag‘larini qaytarib olishi mumkin. Bu haqda agentlik matbuot xizmati xabar bermoqda.

Buning uchun arizani elektron tarzda xorijdaish.uz platformasi orqali yuborish talab etiladi. Fuqarolar avvalo platformada ro‘yxatdan o‘tib, to‘lovni qaytarish bo‘limiga kirishi kerak.

Ariza topshirish jarayonida ketish rejalashtirilgan davlat, to‘lov amalga oshirilgan yil, telefon raqami va to‘langan summa ko‘rsatiladi. Mavjud bo‘lsa, to‘lov kvitansiyasi ham yuklanadi.

Shuningdek, bank ma’lumotlari — karta egasining ism-sharifi, plastik karta raqami, bank tranzit raqami, STIR va MFO — to‘liq kiritilishi lozim. Barcha ma’lumotlar yuborilgandan so‘ng telefon raqamiga tasdiqlovchi SMS xabar yuboriladi.

Arizalar Migratsiya agentligining tegishli boshqarmalari tomonidan ko‘rib chiqiladi. Ma’lumotlar tasdiqlansa, to‘langan mablag‘ fuqaro ko‘rsatgan bank kartasiga o‘tkaziladi. Ariza yuborish muddati 2026-yil 20-martga qadar etib belgilangan.

• Agentlik
• Migratsiya