Moldovada Ukrainaga qarshi urushda foydalanilayotgan “Z” va “V” ramzlaridan foydalanish taqiqlandi. Shuningdek, bu taqiq ostiga nafaqat MDH davlatlarida 9-may kuni namoyishkorona taqiladigan, balki ayni vaqtda Ukrainadagi urushda rus harbiylari tomonidan qo‘llanilayotgan “georgiy tasmasi” ham tushgan.   

Bu haqda kecha, 7-aprel kuni mamlakatdagi hukmron partiya PAS xabar bergan.

Parlament majlisida mazkur partiya Moldovada “harbiy tajovuz, urush jinoyatlari va insoniyatga qarshi jinoyatlar”ni targ‘ib qiluvchi ramz va belgilarni taqiqlash zaruratini ilgari surgan.

Endilikda mazkur ramz va belgilarni mamlakat hududida tarqatish jarimaga sabab bo‘lishi mumkin.

Tegishli hujjatga kiritilgan o‘zgartirishlarga ko‘ra, qoidabuzar shaxslar 900 ley (38 yevro) gacha jarima yoki 60 soatgacha jamoat ishlariga tortilishi mumkin. Yuridik shaxslar uchun esa maksimal jarima miqdori 1800 ley (76 yevro) gacha bo‘ladi.

Maʼlumot uchun, joriy yil 1 aprel kuni Ukraina Oliy Radasi ham rus ramzlaridan foydalanishni taqiqlagan edi. 

• 9-may
• Moldova
• Rossiya
• georgiy tasmasi