Ijtimoiy tarmoqlarda mashhur klipmeyker Narimon Sultonxo‘jayevning sobiq turmush o‘rtog‘i Malika Sultonxo‘jayevaning shikoyati aks etgan video tarqaldi.

Unda ijodkorning oilasiga befarqligi hamda farzandlari uchun kam miqdorda aliment to‘layotgani aytilgan.

“Biz anchadan beri birga yashamayapmiz. 10 yil deganda bitta sabab tufayli ulardan ketdim. Hozirgi paytda men uch bolam bilan ko‘chada qoldim. Onamlarnikida yashayapman. Ular tomonidan umuman moddiy yordam bo‘lmayapti. Shu o‘rinda prezidentimizga bitta savolim bor: Nimaga ayol kishi uch farzandi bilan ham ko‘chada qolishi mumkin? Erkak kishi ajrashayotganida rafiqasi va bolalarini uy bilan ta’minlashi kerak, degan qonun yo‘q. Faqat aliment undirish ko‘zda tutilgan. Sobiq turmush o‘rtog‘im firmaga qorovul sifatida ishga o‘tgani to‘g‘risida ma’lumotnoma to‘g‘rilab, hozirda uch bolaga 750 ming so‘m aliment to‘lab kelyapti. Sobiq turmush o‘rtog‘im Narimon Sultonxo‘jayev bizni uysiz qoldirdi, buning ustiga kam aliment to‘layapti”,- deydi Malika Sultonxo‘jayeva.

Ushbu videoga MIB axborot xizmati munosabat bildirdi.

“Fuqarolik ishlari bo‘yicha Mirzo Ulug‘bek tumanlararo sudining 01.04.2022 yildagi ijro varaqasiga asosan, qarzdor N.A.Sultanxodjayevdan undiruvchi M.R.Sultanxodjayeva foydasiga 1/2 qism miqdorida aliment undirish to‘g‘risidagi ijro hujjati bo‘lim ish yurituviga 2023-yil 28-fevral kuni kelib tushgan va ijro ishi yurituvi qo‘zg‘atilgan.

Ijro harakatlari davomida qarzdor “E.B.” MCHJda ish faoliyatini olib borayotganligi aniqlangan.

Mazkur ijro hujjati bo‘yicha qarzdor tomonidan 07.03.2023 yil kuni undiruvchining hisob raqamiga, 1,5 mln. so‘m, 27.04.2023 yil kuni 750 000 so‘m aliment pullari o‘tkazilgan.

2023-yil 23-may kuni qarzdor yuqorida ko‘rsatilgan aliment pul mablag‘larini to‘lab borishligi to‘g‘risida majburiyatnoma olingan hamda O‘zbekiston Respublikasi MJtKning 47-4-moddasi va JKning 122-moddalari bilan ogohlantirilgan.

“E.B.” MCHJning 2023-yil 18-may kungi ma’lumotiga ko‘ra qarzdorning mehnat shartnomasi bekor qilinganligini ma’lum qilgan.

Joriy yilning 23-may kuni undiruvchining hisob raqamiga jami 780 ming so‘m aliment pullari hamda 4 va 10-iyul kunlari undiruvchining hisob raqamiga jami 2 mln. 180 ming so‘m aliment pullari o‘tkazilgan.

Hozirgi kunda qarzdorning 2023-yil 1-iyul holatiga alimentdan bo‘lgan qarzdorligi mavjud emas”,- deyiladi xabarda.

• Lifestyle
• mashhurlar
• qiziqarli