Finlyandiyaning telekommunikatsiya uskunalari ishlab chiqaruvchi “Nokia” kompaniyasi Rossiyaga o‘z mahsulotlarini yetkazib berishni to‘xtatmoqda. Bu haqda “Reuters” agentligi xabar berdi. 

Qayd etilishicha, buning sababi Rossiyaning Ukrainadagi maxsus operatsiyasi va shu sababli AQSh hamda Yevropa Ittifoqi tomonidan Rossiyaga qarshi joriy qilingan sanksiyalar hisoblanadi.

“Nokia” vakili agentlikka ushbu vaziyat murakkab ekani va tez sur’atlar bilan rivojlanib borayotganini, shu munosabat bilan kompaniya uni doimiy ravishda baholab borishini aytib o‘tgan. Nokianing Rossiya vakolatxonasi ushbu masala bo‘yicha so‘rovga javob bermagan.

Ma’lum qilinishicha, “Vimpelcom”, “Megafon” va “Tele 2” bu masala bo‘yicha izoh berishdan bosh tortgan. “NeoAnalytics” ma’lumotlariga ko‘ra, 2020-yilda Rossiya telekommunikatsiya uskunalari bozori hajmi 1,15 trillion rublni tashkil etgan. Bozorning 93 foizi esa xorijiy yetkazib beruvchilar hissasiga to'g'ri keladi.

Bozor yetakchilari – Shvetsiyaning “Ericsson”, “Nokia” va Xitoyning “Huawei” kompaniyalaridir. Bozorda Xitoyning ZTE, Yaponiyaning NEC va Janubiy Koreyaning “Samsung” kompaniyalari ham bor.

Qayd etilishicha, bir necha kun avval “Ericsson” ham Rossiyaga mahsulot yetkazib berishni to‘xtatgan edi.
 

• AQSh
• Nokia
• Rossiya
• Sanksiya
• Shvetsiya