“Hududgaz Toshkent” GTF komplayens nazorat tuzilmalari, “Ohangarontumangaz” GTB, O‘zenergoinspeksiya va Iqtisodiy jinoyatlarga qarshi kurashish Departamenti xodimlari ishtirokida Toshkent viloyatining Ohangaron tumanida tabiiy gazdan noqonuniy foydalanish holatlarini aniqlash bo‘yicha nazorat tadbirlari o‘tkazilishi davomida tumanning “Yonariq” MFYda joylashgan “N.” MChJga tegishli korxonada gaz ta’minoti tashkiloti bilan shartnoma rasmiylashtirmasdan gaz tarmog‘iga ulanib, tabiiy resursdan noqonuniy foydalanib kelingani aniqlangan.

Bu haqda, Energetika vazirligi axborot xizmati xabar berdi.

Ushbu holat yuzasidan dalolatnoma tuzilib, sarflangan tabiiy gaz hajmi qonunchilikda belgilangan tartibda qayta hisob-kitob qilinganda, iste’molchi tomonidan davlat manfaatlariga 8,7 milliard so‘mlik zarar yetkazilgani ma’lum bo‘lgan.

“Barcha hujjatlar huquqni muhofaza qiluvchi organlarga topshiriladi”, – deyiladi xabarda.

• Gaz
• Ohangaron
• Qoidabuzarlik