Joriy yilda kuz fasli yomg‘irsiz o‘tayotgani, kelgusi kunlarda ham yog‘ingarchilik kutilmayotgani, yomg‘ir esa rizq-u ro‘z, mo‘l-ko‘lchilik omili ekani e’tiboridan O‘zbekiston musulmonlari idorasi raisi, muftiy Shayx Nuriddin Xoliqnazar tashabbusi bilan 2025-yil 28-noyabr kuni juma namozidan keyin O‘zbekistondagi barcha masjidlarda ikki rakat istisqo namozi o‘qiladi. Bu haqda O‘zbekiston musulmonlari idorasi matbuot xizmati xabar berdi.

“Payg‘ambarimiz sollallohu alayhi vasallam yomg‘ir yog‘may, suvsizlik bo‘lgan davrlarda jamoat bilan qiblaga yuzlanib duo qilganlari, keyin o‘zlari imom bo‘lib namoz o‘qiganlari rivoyat qilingan. Alloh taolodan suv-yomg‘ir so‘raladigan istisqo namozi fazilati hadis kitoblarida bayon qilingan”, – deyiladi xabarda.

Shuningdek, viloyatlar, tuman-shaharlar markaziy masjidlari va ziyoratgohlarda jonliqlar so‘yilib, yordamga muhtoj oilalar, yetim-yesirlar, beva-bechoralar, miskinlar, boquvchisini yo‘qotgan keksalarga tarqatiladi.

O‘zbekiston musulmonlari idorasi tasarrufidagi Oliy va o‘rta maxsus islom ta’lim muassasalari ustoz va talabalari tomonidan Imom Buxoriy “Sahihi Buxoriy” asari shu yil 28-noyabr kuni juma namoziga qadar xatmi kutub qilinadi.

Xabarga ko‘ra, Makka va Madinada umra ziyoratida bo‘lib turgan ellikboshi imom-domlalarga ham o‘z guruhlari ishtirokida istisqo namozini o‘qishlari tavsiya etilgan.

• Muftiy
• O‘zbekiston musulmonlari idorasi
• xabar