O‘zbekistonda qurilayotgan pulli yo‘llarda soatiga 150 kilometrgacha tezlikda harakatlanishga ruxsat etilishi ko‘zda tutilmoqda. Bu haqda Avtomobil yo‘llari qo‘mitasi bosh yuriskonsulti Hasan Umarov ma’lum qildi.

Uning ta’kidicha, “Avtomobil yo‘llari to‘g‘risida”gi qonunning yangi tahririda pulli yo‘llar faqat bepul yo‘lga muqobil trassa sifatida qurilishi belgilanmoqda. Ya’ni har bir fuqaro tanlov imkoniyatiga ega bo‘ladi — xohlasa, davlat tomonidan qurilgan umumiy yo‘ldan bepul harakatlanishi yoki vaqtini tejash maqsadida pulli yo‘l orqali yurishni tanlashi mumkin.

Hasan Umarovning so‘zlariga ko‘ra, pulli yo‘llardagi harakat tezligi 150 km/soatgacha oshirilishi mumkin bo‘ladi. Shu bilan birga, yo‘ldan foydalanish to‘lovi miqdori hukumat tomonidan tasdiqlanadigan maxsus metodika asosida hisoblanadi.

“Hozirgi xomcho‘tlarga ko‘ra, 200 km masofadagi pulli yo‘l uchun to‘lov taxminan 100 ming so‘m atrofida bo‘ladi. Bu hisob-kitoblar hali o‘zgarishi mumkin”, — dedi Umarov.

Qonunga ko‘ra, pulli yo‘llardan tushgan mablag‘lar avvalo yo‘llarni saqlash, ta’mirlash va sifatini oshirish ishlariga yo‘naltiriladi. Agar yo‘llar davlat-xususiy sheriklik asosida qurilgan bo‘lsa, qolgan daromad investor ulushi sifatida hisoblanadi.

Qonunchilik palatasining Tadbirkorlik, raqobatni rivojlantirish va sanoat masalalari qo‘mitasi raisining o‘rinbosari Farhod Zayniyev ta’kidlashicha, pulli yo‘llar faqat yangi, muqobil yo‘l sifatida barpo etiladi va mavjud yo‘llar pulliga aylantirilmaydi.

Shuningdek, qonunda favqulodda holatlarda pulli yo‘llardan bepul foydalanish imkoniyati ham nazarda tutilgan. Tez yordam, ichki ishlar organlari va boshqa maxsus xizmatlar avtotransportlari uchun esa pulli yo‘ldan foydalanish mutlaqo bepul bo‘ladi.

• Tezlik
• Yo'llar