1-sinf o‘quvchilari uchun “Prezident sovg‘alari”ni yetkazish boshlandi

Yangi 2026/2027-o‘quv yili uchun 1-sinfga qabul qilinayotgan o‘quvchilarga mo‘ljallangan “Prezident sovg‘alari”ni hududlarga yetkazish ishlari boshlandi. Maktabgacha va maktab ta’limi vazirligi ma’lum qilishicha, o‘quv qurollari 15-avgustga qadar barcha hududlarga, 25-avgustga qadar esa maktablarga to‘liq yetkazilishi rejalashtirilgan.

Vazirlik ma’lumotiga ko‘ra, 2026/2027-o‘quv yilida respublikadagi 10 225 ta umumta’lim maktabida 550 mingdan ortiq pedagog 6,7 milliondan ziyod o‘quvchiga ta’lim beradi.

Joriy o‘quv yilida 795 mingdan ortiq bola 1-sinfga qabul qilinishi rejalashtirilgan. 5-avgust holatiga ko‘ra, ulardan 680 ming nafari, ya’ni rejaning 85 foizi maktablarga qabul qilingan.

1-sinf o‘quvchilari uchun tayyorlangan “Prezident sovg‘asi” to‘plami 12 turdagi o‘quv qurolidan iborat. To‘plamga o‘quv sumkasi, daftarlar, ruchka, oddiy va rangli qalamlar, rangli qog‘oz, plastilin, rasm daftari, o‘chirg‘ich, akvarel bo‘yoqlari, yelim hamda qalamdon kiritilgan.

Mazkur o‘quv qurollari 25-avgustga qadar maktablarga qabul qilingan o‘quvchilar soniga mos ravishda to‘liq yetkaziladi. “Prezident sovg‘alari” esa “Birinchi qo‘ng‘iroq” tadbirlaridan so‘ng 1-sinf o‘quvchilariga tantanali ravishda topshiriladi.

Shuningdek, ushbu sovg‘alar nodavlat maktablar hamda boshqa vazirlik va idoralar tasarrufidagi ta’lim muassasalarida tahsil oladigan 1-sinf o‘quvchilariga ham beriladi.

Vazirlikning ta’kidlashicha, har bir birinchi sinf o‘quvchisini o‘quv qurollari bilan o‘z vaqtida ta’minlash maqsadida adm.maktab.uz elektron platformasi orqali maktablar kesimida o‘quvchilar ro‘yxati shakllantirilgan.