Joriy yilning 29-iyul kuni Toshkent viloyati Qibray tumani, Istiqbol mahallasida yashovchi fuqaro A.Yernazarov va uning oila a’zolari vahshiylarcha o‘ldirib ketilgan va mazkur holat o‘z vaqtida ijtimoiy tarmoqlarda keng tarqalgan edi.
Joriy yilning 14-dekabr kuni qotillik sodir etgan 24 yoshli shaxsga nisbatan sud hukmi o‘qildi.
Sud tergovi jarayonida aniqlanishicha, 1997-yil Andijon viloyati, Shahrixon tumanida tug‘ilgan Sh. 2018-yilning yoz faslida ish izlab Qibray tumani, Baytqo‘rg‘on hududiga keladi.
Bu yerda u o‘zidan 10 yosh katta bo‘lgan, ikki nafar farzandning onasi M.A bilan tanishadi va shu bilan ular 2021-yil may oyigacha o‘zaro ishqiy munosabatlarda bo‘lib kelishadi. 2021-yil 11-may kuni Sh. ishlash maqsadida Rossiyaga ketadi.
U Rosiyada ekanligi paytida M.A bilan orasidan gap qochadi va avvaldan telefonida saqlab yurgan ishqiy sahnalari aks etgan videomateriallarni internetga joylab yuboradi.
Shu tariqa ayol bilan o‘rtalaridagi munosabat butkul tugaganidan alamzada bo‘lgan Sh. endi qizni qasddan o‘ldirishni maqsad qiladi.
U 2021-yil 25-iyul kuni tunda “Moskva-Toshkent” yo‘nalishidagi reys bilan Toshkentga uchib keladi va 26-iyul kuni M.Aning ish joyiga u bilan uchrashib, yana urishib qoladi.
Sh. yana 2021-yil 29-iyul kuni kech soat 23:30larda oldindan tayyorlangan oshxona pichog‘i, tibbiy niqob va qo‘lqopni olib, M.A yashaydigan uyga boradi. Uyning kirish darvozasi ochiqligi va hovlida chiroq o‘chganini ko‘rib, hovlidan o‘tib uyning yashash xonadoniga sezdirmasdan kiradi va dahlizda uxlab yotgan M.Aning singlisi 1988-yilda tug‘ilgan M.Yeni ko‘rib qoladi. Xona qorong‘u bo‘lgani bois uni M.A deb o‘ylab, pichoq bilan M.Aning singlisini ko‘krak sohasiga bir necha marotaba urib uni o‘ldiradi. Shu tobda M.Yening baqirgan tovushini eshitib, uning otasi uyg‘onib qoladi. Tovush chiqqan tomonga kelgan qizning otasi 1960-yilda tug‘ilgan A.Yeni ko‘rgan qotil, qasddan o‘ldirish maqsadida unga ham tashlanadi, va uning ko‘krak sohasiga bir necha bor pichoq urib, qasddan o‘ldiradi. Bu orada hovlida uxlab yotgan M.A ning ukasi 1997-yilda tug‘ilgan A.E ham shovqin surondan uyg‘onib ketadi. Yordam so‘rab baqirgan tovushlarni eshitib, uy ichkarisiga kirmoqchi bo‘lganda u ham Shavkatga duch keladi. Qotil uning ham faol qarshiligini yengib, ko‘krak qafasi va chap qo‘ltiq sohasiga bir necha marotaba pichoq tiqib o‘ta shafqatsizlarcha o‘ldiradi.
Shu kuni ushbu xonadonda qurilish ishlarini bajarish uchun kelgan yollanma ishchi 1984-yilda tug‘ilgan Baxtiyor Qunduzov ham bo‘lgan. Afsuski Baxtiyorning ham qismatida qotilning qo‘lidan o‘lim topadi.
Qotilning asosiy nishoni – M.Ani o‘ldirish edi. Shu tariqa hovlidagi temir karavotda uxlab yotgan M.Ani ko‘rib, karavot ustiga sakrab chiqadi va u yerda uxlab yotgan M.Aning onasi, uning voyaga yetmagan qizi, singlisi va uning voyaga yetmagan farzandlarini ko‘z o‘ngida, o‘ta shafqatsizlik bilan M.Ani yurak sohasi va chap ko‘z qismiga bir necha marta pichoq sanchib qasddan o‘ldiradi.
Bu onda M.Aning onasi baland ovozda atrofdagi qo‘shnilarni yordamga chaqira boshlaydi. Qotillik sodir etish jarayonida o‘ng qo‘l barmog‘ini kesilib ketishi natijasida yuzaga kelgan qon ketish hamda kuchli og‘riq tufayli Shavkat qolgan harakatlarini oxiriga yetkaza olmasdan, voqea joyidan qochib yashirinadi.
Joriy yilning 14-dekabr kuni Toshkent viloyat sudi jinoyat ishlari bo‘yicha sudlov hay’atining yopiq sud majlisida Jinoyat kodeksining qator moddalari bilan ayblangan Sh.Iga nisbatan qo‘zg‘atilgan jinoyat ishi ko‘rib chiqildi.
Sud Sh.Iga JKning 25,97-moddasi, 119-moddasi 2-qismi “g” bandi, 130-moddasi 2-qismi “a” bandi, 219-moddasi 1-qismi, 140-moddasi 2-qismi, 97-moddasi 2-qismi “a,v,g,j,r” bandlari bilan, Jinoyat kodeksining 59-moddasi 4-qismi tartibida umrbod ozodlikdan mahrum qilish jazosi tayinladi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!