Mustaqillikning 35 yilligi munosabati bilan mamlakatning turli hududlarida samarali mehnat qilib, o‘z sohasiga munosib hissa qo‘shib kelayotgan fuqarolarning xizmatlari munosib baholandi.

Surxondaryolik mehnat faxriysi Abdusattor Qurbonovning cho‘l hududlarini o‘zlashtirish va dehqonchilikni rivojlantirish borasidagi ko‘p yillik faoliyati haqiqiy qahramonlik sifatida e’tirof etildi.

Bekobod metallurgiya kombinatida uzoq yillardan buyon po‘lat erituvchi bo‘lib ishlab kelayotgan G‘ulomjon Turonov “Xizmat ko‘rsatgan sanoat xodimi” faxriy unvoni bilan taqdirlandi. Ushbu e’tirof mamlakat metallurgiya sohasi vakillarining fidokorona mehnatiga berilgan yuksak baho bo‘ldi.

Shuningdek, paxtachilik va g‘allachilikda yuqori natijalarga erishib, o‘z maktabini yaratgan namanganlik Ilhom Ziyovuddinov, ipak qurtini uch mavsum davomida parvarishlab, mo‘l hosil olayotgan buxorolik pillakor Jamila Xudoyberdiyeva, chorvachilikka ilg‘or texnologiyalarni joriy etayotgan qoraqalpog‘istonlik Esenbay Aytimuratov hamda suv yo‘qotishlarini kamaytirishga hissa qo‘shayotgan samarqandlik irrigator Aslanqul Karimqulovning xizmatlari ham alohida e’tirof etildi.

O‘zbekistondagi Islom sivilizatsiyasi markazi va Samarqanddagi Imom Buxoriy majmuasini bezatish ishlarida qatnashgan usta-naqqosh Sattorxo‘ja To‘xtaxo‘jayevga esa “Xizmat ko‘rsatgan quruvchi” faxriy unvoni berildi.

Davlat mukofotlari va faxriy unvonlar bilan taqdirlanganlarning faoliyati turli sohalarda fidokorona mehnat qilayotgan yurtdoshlar uchun munosib namuna bo‘lib xizmat qiladi.