Sankt-Peterburg Xalqaro iqtisodiy forumida Rossiya gazini O‘zbekistonga yetkazib berish bo‘yicha shartnoma va respublika gaz uzatish tizimini Rossiya gazini qabul qilishga tayyorlash bo‘yicha "Yo‘l xaritasi" imzolangandi.

Energetika vazirligining xabar berishicha, shartnoma doirasida joriy yilning 1-oktyabr sanasidan kuniga 9 million kubometr tabiiy gazni import qilish boshlanishi mo‘ljallanmoqda. Shunga ko‘ra, yillik hajm qariyb 2 milliard 800 million kubometrni tashkil etadi.

Maʼlum qilinishicha, tabiiy gaz narxi mintaqadagi bozor narxlari asosida, shuningdek, O‘zbekistondagi amaldagi narxlar hamda ularni bozor tamoyillari asosida shakllantirish bo‘yicha amalga oshirilishi rejalashtirilayotgan islohotlardan kelib chiqib, kelishilgan.

O‘zbekiston Energetika vazirligi va “Gazprom” o‘rtasida imzolangan "yo‘l xaritasi"ga muvofiq, avval tabiiy gaz "O‘rta Osiyo – Markaz" magistral gaz quvuri orqali Qozog‘istondan tranzit bilan Rossiyaga yuborilganligi va endilikda gazning revers rejimida (teskari oqimda) O‘zbekistonga yetkazilishini, shuningdek, respublika hududida yangi gaz o‘lchash stansiyasi qurilishini hisobga olgan holda, belgilangan tadbirlarni joriy yilning sentyabr oyiga qadar yakunlash rejalashtirilgan.

Xususan, "yo‘l xaritasi" doirasida O‘zbekiston gaz-transport tizimidagi 3 ta gaz haydash uskunasi yangilariga almashtiriladi va 11 ta turli rusumdagi gaz haydash uskunasida mukammal taʼmirlash hamda tiklash ishlari bajariladi. 22 kilometrlik yangi magistral gaz quvurlari quriladi va 56 kilometrlik gaz quvurlari taʼmirlanadi.

• Gazprom
• Rossiya