18-may kuni O‘zbekiston Prezidenti Administratsiyasi rahbari Saida Mirziyoyeva Londonda AQSH Prezidenti Donald Trampning Janubiy va Markaziy Osiyo bo‘yicha maxsus vakili, elchi Serjio Gor bilan uchrashdi. Bu haqda u o‘zining Telegram kanalida ma’lum qildi.

“Londonda AQSH Prezidentining Janubiy va Markaziy Osiyo bo‘yicha maxsus vakili, elchi Serjio Gor bilan uchrashganimdan juda mamnun bo‘ldim. Uning birja savdolarining ochilish marosimida yonimizda turib, qo‘llab-quvvatlagani biz uchun alohida ahamiyat kasb etdi”, — dedi O‘zbekiston Prezidenti Administratsiyasi rahbari.

Uning bildirishicha, uchrashuv davomida tomonlar o‘zaro aloqalarni yanada mustahkamlash istiqbollarini muhokama qilib, oldinga qo‘yiladigan aniq qadamlar bo‘yicha kelishuvga erishgan.

Eslatib o‘tamiz, avvalroq Saida Mirziyoyeva London fond birjasida mamlakat aksiyalarining tarixda ilk bor xalqaro ommaviy savdoga chiqarilish marosimida ishtirok etgani haqida xabar berilgan edi. Shundan so‘ng u siyosatchilar va moliyaviy tashkilotlar rahbarlari, jumladan Buyuk Britaniya Bosh vaziri Kir Starmerning investitsiyalar bo‘yicha maslahatchisi Varun Chandra, Markaziy Osiyo va Ozarbayjon bo‘yicha savdo vakili lord Jon Olderdeys, Franklin Templeton bosh ijrochi direktori Jenni Jonson hamda London fond birjasi bosh ijrochi direktori Julia Enn Hogget bilan uchrashuvlar o‘tkazdi.