Oʻzbekiston Respublikasi Prezidenti Shavkat Mirziyoyev BMTning Aholi punktlari boʻyicha dasturi shafeligida Boku shahrida oʻtkazilayotgan Butunjahon urbanizatsiya forumining 13-sessiyasi ochilish marosimida ishtirok etdi.

Boku Kongress markazida davlatimiz rahbarini Ozarbayjon Prezidenti Ilhom Aliyev hamda BMTning Aholi punktlari boʻyicha dasturi ijrochi direktori Anaklaudiya Rossbax kutib oldi.

Forumning bu yilgi mavzusi — “Barcha uchun uy-joy: xavfsiz va barqaror shaharlar hamda hamjamiyatlar”.

Unda davlat va hukumat rahbarlari, xalqaro tashkilotlar hamda rivojlanish institutlari vakillari ishtirok etmoqda.

Forum doirasida shaharlarni barqaror rivojlantirish, zamonaviy va arzon uy-joylar qurish, shahar muhiti sifatini yaxshilash, iqlim barqarorligini mustahkamlash hamda transport infratuzilmasini rivojlantirish masalalari muhokama qilinadi.

Shuningdek, Prezident Shavkat Mirziyoyev forum doirasidagi Yetakchilar sammitida nutq soʻzlashi rejalashtirilgan.