Bugun Namangan shahridagi “Ma’rifat maskani”da respublikaning turli hududlaridan tashrif buyurgan media sohasi vakillari va ekspertlar ishtirokida “Media haftalik”ka start berildi.

Haftalikning rasmiy ochilishidan so‘ng ishtirokchilar yo‘nalishlar bo‘yicha 3 ta guruhga ajratilib, o‘quv mashg‘ulotlari boshlandi.

Mashg‘ulotlar tajribali mutaxassislar va media ekspertlari tomonidan olib borilmoqda. Unda sun’iy intellekt va media, faktcheking, media xavfsizligi, kontent strategiyasi, mobilografiya va vizual storytelling, auditoriya bilan ishlash sirlari, SMM hamda zamonaviy media trendlarga alohida e’tibor qaratilmoqda.

Shuningdek, ochiq muloqot shaklidagi suhbatlar davomida o‘zaro tajriba va fikr almashilmoqda

Mazkur haftalik O‘zbekiston Respublikasi Prezidenti Administratsiyasi huzuridagi OAV uchun Kontent tayyorlash markazi, Namangan viloyati hokimligi hamda Yoshlar ishlari agentligi hamkorligida tashkil etilgan bo‘lib, 22-mayga qadar davom etadi.