Davlat rahbarining tashabbusi bilan Payariq tumanidagi Imom Buxoriy majmuasi qaytadan bunyod etilmoqda.

Joriy yilda foydalanishga topshirilishi kutilayotgan ziyoratgohda ayni paytda maqbara, 10 ming kishiga mo‘ljallangan masjid qurib bitkazib bo‘lingan.

Majmuaning to‘rt tomonida har birining balandligi 75 metr bo‘lgan 4 ta minora qad rostlagan. Shuningdek, bu yerda muzey, ayvonlar, ma’muriyat va xizmat ko‘rsatish binolari barpo etilib, pardozlash ishlari olib borilmoqda. 

“Imom Buxoriy majmuasi atrofining 20 gektarida mehmonxonalar, uy mehmonxonalar va tashrif markazlari qurilmoqda. Jumladan, qariyb 400 o‘ringa ega to‘rt yulduzli bitta, 300 o‘ringa ega uch yulduzli ikkita mehmonxona barpo etilmoqda. Shu bilan birga hududda avtoturargohlar, xizmat ko‘rsatish shoxobchalari tashkil etilmoqda”– dedi Payariq tumani hokimi o‘rinbosari Rashid Ismoilov.

• Imom Buxoriy
• Samarqand
• yodgorlik