O‘zbekistonda 2026-yilning ikkinchi choragidan boshlab uy-joy narxlari indeksini hisoblashning yangi metodologiyasi joriy etildi. Milliy statistika qo‘mitasi ma’lumotiga ko‘ra, yangi usul Xalqaro valyuta jamg‘armasi ekspertlari ko‘magida ishlab chiqilgan bo‘lib, uy-joylarning maydoni, joylashuvi, qavati, xonalar soni va boshqa xususiyatlarini hisobga oluvchi gedonik regressiya usuliga asoslanadi. Shuningdek, ilk bor yakka tartibdagi uylar ham hisob-kitoblarga kiritildi.

Statistik ma’lumotlarga ko‘ra, 2026-yilning ikkinchi choragida Toshkent shahrida kvartiralar narxi o‘tgan chorakka nisbatan 1,3 foizga, yillik hisobda esa 3,9 foizga oshgan. Yangi qurilgan uylardagi kvartiralar narxi esa bir yil davomida 5 foizga qimmatlashgan.

Shu bilan birga, poytaxtdagi yakka tartibdagi uylar narxi birinchi chorakka nisbatan 0,7 foizga pasaygan. Biroq ularning qiymati o‘tgan yilning shu davriga nisbatan 1,2 foiz yuqoriligicha qolgan. Hududlarda esa uy-joylar narxi chorak davomida 2,8 foizga oshgan bo‘lsa-da, yillik hisobda 2,7 foizga kamaygan.

Hisobotga ko‘ra, birlamchi bozorda uy-joy narxlari chorak davomida 0,7 foizga, yillik hisobda esa 7,1 foizga oshgan. Ikkilamchi bozorda esa narxlar mos ravishda 1,6 foiz va 4,2 foizga ko‘tarilgan.

Uy-joy narxlari indeksi internet e’lonlarida ko‘rsatilgan narxlar asosida shakllantiriladi va amalda tuzilgan oldi-sotdi bitimlari qiymatini aks ettirmaydi. Toshkent shahri bo‘yicha ma’lumotlar to‘liq OLX.uz platformasi asosida yig‘ilsa, hududlarda ma’lumotlarning 48 foizi ushbu manbadan, qolgan qismi esa boshqa ochiq manbalardan olinadi. 2026-yilning birinchi yarmida respublika bo‘yicha har chorakda qariyb 150 mingta uy-joy e’loni tahlil qilingan.

Milliy statistika qo‘mitasi hozircha birlamchi va ikkilamchi bozorlar hamda hududlar kesimida kvadrat metrning o‘rtacha narxlarini e’lon qilish rejalashtirilmaganini ma’lum qildi.